باياناۋىلدا ولجاباي جانە جاسىباي باتىرلارعا ەسكەرتكىش ورناتىلادى

باياناۋىل. قازاقپارات - پاۆلودار وبلىسىنىڭ باياناۋىل اۋدانىندا ولجاباي جانە جاسىباي باتىرلارعا ەسكەرتكىش ورناتىلادى.

بۇل تۋرالى 2020-جىلدىڭ قورىتىندىسى بويىنشا تۇرعىندارعا ونلاين فورماتتا ەسەپ بەرگەن اۋدان اكىمى قانات كارىموۆ ايتتى، دەپ حابارلايدى قازاقپارات ravlodarnews.kz سايتىنا سىلتەمە جاساپ.

«بيىلعا جوسپارلانعان ەڭ باستى اۋقىمدى جۇمىستىڭ ءبىرى - دەمەۋشىلەر تاراپىنان ساتبايەۆ - بايازيتوۆ كوشەلەرىنىڭ قيىلىسىندا مادەني دەمالىس ساياباعىن سالۋ. ساياباققا بولىنگەن اۋماق اۋدان ورتالىعىنا كىرەبەرىستە ورنالاسقان جانە ۇزاق جىلدار بويى پايدالانىلماي، بوس جاتقان سازدى جەر. بۇل جەر جەكە تۇرعىن ءۇي مەن عيمارات قۇرىلىسىن سالۋعا قولايسىز. سوعان بايلانىستى اۋدان ورتالىعىن كوركەيتۋ، اباتتاندىرۋ ماقساتىندا ساياباق سالۋ جوباسى قولعا الىندى. جوبا اۋداندىق «اقساقالدار القاسى»، «قوعامدىق كەڭەس» مۇشەلەرىمەن جان-جاقتى تالقىلانىپ، قولداۋعا يە بولدى»، - دەدى قانات كارىموۆ.

اۋدان اكىمىنىڭ ايتۋىنشا، ساياباقتىڭ اۋماعى 2,6 گەكتاردى قۇرايدى. 564 ءتۇپ اعاش وتىرعىزىلىپ، 678 شارشى مەتر گۇلزار ەگىلەدى، جاياۋ جۇرگىنشىلەرگە ارنالعان 2596 شارشى مەتر جولاق توسەلەدى. بالالارعا ارنالعان ويىن الاڭدارى مەن جاستاردىڭ ۆوركاۋت الاڭى بولادى. 108 دانا ساياباق شامى، جۇزدەن استام ورىندىق ورناتىلادى. ساياباق دەمالۋشىلارىنا ارنالعان كولىك تۇراعى ۇيىمداستىرىلادى.

«ساياباقتىڭ ورتاسىندا ەسىمدەرى اڭىزعا اينالعان، جەرىمىزدى جاۋدان قورعاپ قالعان باتىر بابالارىمىز - ولجاباي جانە جاسىباي باتىرلارعا ارنالعان ەڭسەلى ەسكەرتكىش ورناتىلادى. ەسكەرتكىش قولادان قۇيىلادى، تۇعىرىمەن قوسا ەسەپتەگەندە جالپى بيىكتىگى - 26,5 مەتر. بۇل ساياباق اۋدان تۇرعىندارى مەن قوناقتارى ءۇشىن ەڭ كورنەكتى ورىنداردىڭ ءبىرى بولماق. جوبا اياسىندا ءدامحانا، قوعامدىق دارەتحانا سالۋدىڭ پەرسپەكتيۆاسى قاراستىرىلعان. دەمالۋشىلار، وتباسىمەن، دوستارىمەن، تۋعان-تۋىستارىمەن كەلىپ، تازا اۋامەن تىنىستاپ، رۋحاني دەمالىپ قايتاتىن بولادى»، - دەيدى اۋدان اكىمى.