ەلوردادا «مەيرىمدى قوعام قۇرۋ» يدەياسى تالقىلاندى
شاراعا قاتىسقان زيالى قاۋىم وكىلدەرى اۆتوردىڭ «مەيرىمدى قوعام قۇرۋ» يدەياسىن تالقىلادى. جازۋشى بۇل كىتابىندا قازاق قوعامىن مەيىرىمدى قوعامعا اينالدىرۋدىڭ جانە ەل استاناسى نۇر-سۇلتان قالاسىن الەمنىڭ ەڭ مەيىرىمدى قالاسىنا اينالدىرۋدىڭ تۇجىرىمدامالارىن جاساعانىن ايتادى.
«قازاق حالقىنىڭ ونە بويى تۇگەل مەيىرىم مەن قايىرىمعا تولى اسىل قازىنا، قانىندا، مەنتاليتەتىندە مەيىرىمنىڭ كۇشى، قۇدىرەتى، قۇندىلىعى ساقتالعان حالىق. ءسويتىپ، قۇلدىق جۇيەنىڭ قالىپتاستىرعان قاتىگەزدىگىنەن ايىعىپ، مەيىرىمدىلىك قاتىناس ارقىلى العا دامۋىدىڭ جاڭا جولىن ءوزىمىز اشامىز. سول ءۇشىن قازاقتىڭ مەنتاليتەتىندەگى مەيىرىمدىلىك قاسيەتىن، قۇندىلىعىن، قايىرىمدىلىعىن اتادان جالعاسقان جاقسى سالت-ءداستۇرىن ەلباسىنىڭ «رۋحاني جاڭعىرۋ» يدەياسى اياسىندا جالعاستىرىپ، ازاماتتىق قوعامنىڭ ەسىگىن اشۋىمىز كەرەك. مۇنىڭ ءبارىن «مەيىرىمدى قوعام، مەملەكەتتىڭ قاجەتتىلىگى، ونىڭ پايداسى» اتتى ەڭبەگىمدە بارىنشا دالەلدەۋگە تىرىستىم»، - دەيدى ۇزبەن قۇرمانباي ۇلى.
ال، مەملەكەت قايراتكەرى عاريفوللا ەسىم بۇل يدەيا تەك قازاق حالقىنىڭ عانا ەمەس، تىعىرىققا تىرەلگەن الەم حالىقتارىنىڭ الدىن اشاتىن جول ەكەنىنىن العا تارتادى.
«مەيىرىمدى قوعام قۇرىپ، مەيىرىمدىلىك زاڭدىلىعىنا باعىنۋ ارقىلى عانا بۇگىنگى قيىندىقتىڭ بارىنەن شىعا الامىز. ەگەر وسىلاي جاساي الماساق ءبارى بەكەر، العا قارىشتاپ دامۋدىڭ وزگە جولى جوق ەكەنى دە تۇسىنىكتى. مەن مۇنى بۇرىنان ايتىپ كەلگەنمىن. ال، بۇگىن ۇزبەن قۇرمانباي ۇلى تايعا تاڭبا باسقانداي ەتىپ ايقىنداپتى. ەندى بىزگە نە كەرەك، ءدال وسى كوتەرىلگەن ماسەلەنى ۇلتتىق يدەولوگيا ەتۋىمىز كەرەك. ءتىپتى تاۋەلسىزدىگىمىزدىڭ العاشقى جىلدارىندا ەكونوميكالىق تۇرعىدا نارىق زاڭدارىن قابىلداعانداي رۋحاني تۇرعىدا مەيىرىمدىلىك زاڭدىلىعىن تۋ ەتۋىمىز كەرەك ەدى. بۇل يدەيا تەك قازاق حالقىنىڭ عانا ەمەس، تىعىرىققا تىرەلگەن الەم حالىقتارىنىڭ الدىن اشاتىنىنا سەنىمدىمىن. تىڭنان كوتەرىلگەن بۇل يدەيانى ەلباسى، پرەزيدەنتتەن باستاپ بۇكىل حالىق قولداۋ ەمەس، تۋرا ىسكە اسىرۋىمىز قاجەت»، - دەيدى عاريفوللا ەسىم.
جازۋشى ءجادي شاكەن ۇلى «مەيىرىمدى قوعام» يدەياسى كەشەگى بابالارىمىزدىڭ ارمانى ەكەندىگىن ايتادى.
«مەيىرىمدى قوعام - بۇل كەشەگى وتكەن ءال- فارابي، اسان قايعى، اباي سىندى بابالارىمىزدىڭ ارمانى. ەگەر پرەزيدەنتىمىز بارلىق لاۋازىم يەلەرىن مەيىرىمدى بولۋعا شاقىرىپ، ادامدارمەن مەيىرىمدىلىك اياسىندا قاتىناسۋدى تاپسىرسا، سول كۇننەن باستاپ قوعام وڭالادى. مەيىرىمدىلىك زاڭدىلىعى عانا ءبارىن وڭايتىنى، تۇزەيتىنى، حالىقتى باي، باقۋاتتى ەتەتىنى ءومىر شىندىعى»، - دەيدى جازۋشى.
ايتا كەتەيىك شارانى ۇيىمداستىرۋعا «وتانداستار قورى» قولداۋ بىلدىرگەن.
«بيىل ەل تاۋەلسىزدىگىمەن بىرگە كوشى- قوننىڭ باستالعانىنا 30 جىل تولىپ وتىر. ەلگە كەلگەن ميلليوننان استام قانداسىمىز ءار سالادا ءوز ۇلەسىن قوسىپ ءجۇر. وسىعان وراي «وتانداستار قورى» «قانداسپەن كەلگەن قازىنا» اتتى جاڭا جوبا باستاعان بولاتىن. بۇل جوبا ەلگە كەلىپ ەڭبەگى سىڭگەن تۇلعالاردى تانىستىرۋ سولاردىڭ ەلگە سىڭىرگەن ەڭبەگىن كورسەتۋ. بۇگىنگى شارادا وسى ۇلكەن جوبانىڭ باستاماسى»، - دەيدى «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ.
اۆتور: ريزابەك نۇسىپبەك ۇلى
