قازاقستاندىق «شاعالا» ۇشقىشسىز ۇشۋ اپپاراتى پوليگوندا سىناقتان وتۋدە
بۇل اپپاراتى ق ر تۇڭعىش پرەزيدەنتى - ەلباسى اتىنداعى ۇلتتىق قورعانىس ۋنيۆەرسيتەتىنىڭ اسكەري عالىمدارى جاساعان. قازىرگى زامانعى اسكەري قاقتىعىستاردا ۇشقىشسىز ۇشۋ اپپاراتتارىن قولدانۋ، وسىنداي قۇرىلعىلار جاساۋ قاجەتتىگىن دالەلدەدى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
ۇلتتىق قورعانىس ۋنيۆەرسيتەتىندە قارسىلاستىڭ بروندى تەحنيكاسى مەن كۇشىنە قارسى ءتيىمدى قارۋ رەتىندە تەك بارلاۋ دروندارىن عانا ەمەس، سونىمەن قاتار سوققى بەرۋشى ۇشقىشسىز ۇشۋ اپپاراتىن قولدانۋعا دا تالداۋ جاسالدى. «شاعالا» بارلاۋشى ۇشقىشسىز ۇشۋ اپپاراتىنىڭ تاجىريبەدەگى نۇسقاسى باعدارلامالىق- اپپاراتتىق بايلانىس ارناسىمەن، بايلانىس ارناسى قورعالعان جەكە كريپتوگرافيالىق حاتتامامەن جابدىقتالعان.
«ۇشقىشسىز ۇشۋ اپپاراتى اۋقىمىندا اسكەرلەردى وتاندىق تۋىندىلارمەن قامتاماسىز ەتۋگە دەگەن ۇمتىلىس قۋانتادى. دەگەنمەن، قازاقستاندىق قۇوىلعىنىڭ وزگە مەملەكەتتەردىڭ اپپاراتتارىنان ايىرماشىلىعى بولۋى كەرەك. باسقاشا ايتقاندا ءبىزدىڭ اپپاراتىمىز تاكتيكالىق- تەحنيكالىق سيپاتتامالارى جاعىنان قازاقستاندىق ارميانىڭ بارلىق قاجەتتىلىكتەرىن، ەلىمىزدىڭ گەوگرافيالىق ەرەكشەلىكتەرىگ ەسكەرە وتىرىپ دايىندالۋى كەرەك»، - دەپ اتاپ ءوتتى ق ر قورعانىس ءمينيسترىنىڭ ورىنباسارى گەنەرال- لەيتەنانت تيمۋر داندىبايەۆ.
زەرتتەۋگە ارنالعان ۇلگىنى پوليگوندا سىناقتان وتكىزۋ كەزىندە اسكەري عالىمدار تومەن تەمپەراتۋراعا ءتوزىمدى قۋات كوزىنىڭ جاڭا ءونىمىن سىناقتان وتكىزدى. ەرەكشە اككۋمۋلياتور باتارەيالارىن ۇلتتىق قورعانىس ۋنيۆەرسيتەتىنىڭ ماماندارى ويلاپ تاپتى.
«شاعالا» ۇشقىشسىز ۇشۋ اپپاراتىن شىعارۋ ءۇشىن وتاندىق قورعانىس- ونەركاسىپ كەشەنىنىڭ مۇمكىندىكتەرىن ەسكەرە وتىرىپ، قىزمەت كورسەتۋ، تەحنيكتەر مەن وپەراتورلاردى وقىتۋ باعدارلامالارى، سونداي- اق قارۋلى كۇشتەردىڭ وقۋ ورىندارى مەن بولىمدەرىندە ونى ەنگىزۋ ءۇشىن ۇشقىشسىز ۇشۋ اپپاراتى وپەراتورلارىنىڭ جاۋىنگەرلىك دايارلىق كۋرسى ازىرلەندى. اسكەري عىلىمي- زەرتتەۋ ورتالىعىنىڭ باستىعى پولكوۆنيك قۋاندىق اقشولاقوۆتىڭ ايتۋىنشا، «شاعالا» ۇشقىشسىز ۇشۋ اپپاراتى وسىعان ۇقساس شەتەلدىك اپپاراتتاردىڭ تەحنيكالىق سيپاتتامالارىنان كەم تۇسپەيدى، كەرىسىنشە وزىندىك ارتىقشىلىقتارعا يە.
«ۇشقىشسىز ۇشۋ اپپاراتىنىڭ ۇشۋ قاشىقتىعى 30 شاقىرىمعا دەيىنگى ارالىقتى قۇرايدى. اۋادا ول ەكى جارىم ساعاتقا دەيىن بولادى، جەلدىڭ ەكپىنى سەكۋندىنا 14 مەترگە دەيىن كۇشەيگەن كەزدە، اۋادا ءوزىن تۇراقتى ۇستايدى. بولاشاقتا ءبىز ونى ۆزۆودتان باتالونعا دەيىنگى بۋىنداعى اسكەرلەردىڭ قارۋ- جاراق قاتارىنا قوسۋدى جوسپارلاپ وتىرمىز»، - دەدى اسكەري عىلىمي- زەرتتەۋ ورتالىعىنىڭ باستىعى پولكوۆنيك قۋاندىق اقشولاقوۆ.
سىناق رەتىندەگى ۇشۋلار باعدارلاماسىندا «شاعالا» ۇشقىشسىز ۇشۋ اپپاراتىن دايىنداۋدىڭ ءارتۇرلى كەزەڭدەرى مەن جۇمىس رەجيمدەرى ۇسىنىلدى. عىلىمي جۇمىستىڭ ناتيجەلەرى پاتەنتتەلگەن جانە دە تاجىريبە اياقتالعاننان كەيىن بارلىق اتقارىلعان جۇمىستار قازاقستاننىڭ قورعانىس- ونەركاسىبى كەشەنىنە بەرىلەتىن بولادى.
