حالىق ۇنىنە قۇلاق اساتىن مەملەكەت: ەلوردادا تۇرعىندارعا ارنالعان سايت اشىلادى
بۇل تۋرالى نۇر- سۇلتان قالاسىنىڭ اكىمى التاي كولگىنوۆ ءمالىم ەتتى، دەپ حابارلايدى قازاقپارات ءتىلشىسى.
«ءبىز قالا تۇرعىندارىن مازالاعان ماسەلەلەردى سۇراپ، ءبىلىپ ونى ءاردايىم نازاردا ۇستاۋىمىز كەرەك. ودان بولەك، مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداسىن ۇمىتپاعانىمىز ءجون. قازىرگى ۋاقىتتا حالىقتىڭ تالاپ- تىلەگىنە نازار سالۋ ماقساتىندا قالاداعى 4 اۋدان بويىنشا ەسەپتىك كەزدەسۋ ءوتىپ جاتىر. كارانتين شەكتەۋلەرىنە بايلانىستى ەسەپ بەرۋ ونلاين ءوتىپ جاتىر، دەگەنمەن كەلىپ قوياتىن سۇراعىم بار دەگەن تۇرعىندارمەن تىكەلەي كەزدەسۋ ۇيىمداستىرىپ جاتىرمىز»، - دەدى ا. كولگىنوۆ «استانا» تەلەارناسىنا بەرگەن ەكسكليۋزيۆتى سۇحباتىندا.
سونداي- اق، قالا باسشىسى 10 -اقپان حالىق الدىندا ءوزىنىڭ ەسەپ بەرەتىنىن ءمالىم ەتتى.
«تۇرعىندارمەن قارىم- قاتىناستى ودان ءارى نىعايتا ءتۇسۋ ماقساتىندا ءبىز ءقازىر جاڭا سايت اشىپ جاتىرمىز. Birge.kz دەپ اتالادى. ول سايت قالا ومىرىنە قاتىستى بارلىق سالانى قامتيدى. ياعني دەنساۋلىق ساقتاۋ، ءبىلىم بەرۋ، قۇرىلىس، جول، اباتتاندىرۋ، گازداندىرۋ، جاڭا جۇمىس ورىندارى جانە تاعى باعىتتار قامتىلادى. سايت ارقىلى قالا تۇرعىندارى جوعارىدا اتالعان سالالار بويىنشا ءوزىن تولعاندىرعان ساۋالىن جولداي الادى. سونىمەن قاتار، كوتەرگەن ماسەلەنى شەشۋ جولىن دا ۇسىنا الادى. بارلىق ساۋالدار مەن ۇسىنىستار جيناقتالىپ، قالا بيۋدجەتىن قاراستىرعاندا ەسكەرىلەتىن بولادى»، - دەدى ول.
