نۇر-سۇلتاندا بويجەتكەن «ەلەس» پاتەرلەردى جالعا بەرىپ كەلگەن
«ۇستالعان 25 جاستاعى قىز پايداكۇندەمدىك ماقساتتا جەكە جارنامالار سايتىنا پاتەردىڭ جالعا بەرىلەتىندىگى تۋرالى فەيك اقپارات ورنالاستىرعان. ول جارناما تارتىمدى بولۋى ءۇشىن وزگە حابارلاندىرۋلارداعى پاتەرلەردىڭ سۋرەتىن الدىن الا كوشىرىپ العان. بۇعان قوسا، ول جالداۋ قۇنىن تومەن كورسەتكەن. كەلىسسوزدى تەلەفون ارقىلى جۇرگىزىپ، پاتەردى جالعا الۋشىنىڭ شىن نيەتىنە كوز جەتكىزگەن سوڭ ەلەكتروندى ءاميانعا الدىن الا تولەم اۋدارۋدى ۇسىنعان. زارداپ شەگۋشى اقشا اۋدارعاننان كەيىن الاياق حابارلاندىرۋدى ءوشىرىپ، تەلەفونىن اجىراتىپ قويعان»، - دەلىنگەن نۇر-سۇلتان قالالىق پوليتسيا دەپارتامەنتى تاراتقان اقپاراتتا.
ۆەدومستۆو مالىمەتىنشە، ۇستالعان قىزعا قاتىستى ق ر قىلمىستىق كودەكسىنىڭ 190-بابىمەن سوتقا دەيىنگى تەرگەۋ جۇرگىزىلىپ جاتىر. قازىرگى ۋاقىتتا 13 زارداپ شەگۋشى بەلگىلى بولىپ وتىر. ءبىراق، ولاردىڭ سانى مۇنان دا كوپ بولۋى مۇمكىن. جالپى كەلتىرىلگەن زالال 500 مىڭ تەڭگەنى قۇرايدى.
«ونلاين قىزمەت پەن ساۋدا- ساتتىقتىڭ دامۋىنا وراي ينتەرنەت- الاياقتىق سانى دا ارتا تۇسۋدە. تەك وسى جىلدىڭ قاڭتار ايىندا عانا كيبەرالاياقتىق بويىنشا 290 شاعىم ءتۇستى. نۇر-سۇلتان قالالىق پوليتسيا دەپارتامەنتى شىن حابارلاندىرۋدى جالعان جارنامادان اجىراتۋ ءۇشىن ۇسىنىلعان قىزمەتتەر مەن تاۋارلاردىڭ شىن ەكەندىگىن تەكسەرىپ الۋدى ۇسىنادى. الدىن الا تولەم جىبەرمەۋ قاجەت جانە قىزمەت تولەمىن ونىڭ شىنايى ەكەندىگىنە كوز جەتكىزگەن سوڭ عانا جاساعان دۇرىس»، - دەدى پوليتسيادان.
