امەريكالىق جازۋشى بوزجىراداعى قۇرىلىستى قازاق حالقىنا قارسى قىلمىس دەپ اتادى
ونىڭ پىكىرى adamdar.ca سايتىندا جاريالاندى، - دەپ حابارلايدى Tengrinews.kz ءتىلشىسى.
سالوپەك شاتقالداعى قۇرىلىستى ەكولوگيالىق جاعىنان دا، تاريحي تۇرعىدان دا دۇرىس ويلاستىرىلماعان جانە قاۋىپتى دەپ سانايدى.
«2016-جىلى ماعان بوزجىرانىڭ جانىنان - باتىس قازاقستاننىڭ شالعايداعى، بيىك اق جارتاستارىنان جاياۋ ءجۇرۋ باقىتى بۇيىردى. شىنىندا دا، بۇل - جەر بەتىندە ساقتالعان تابيعي سۇلۋلىقتىڭ ۇلى عيباداتحانالارىنىڭ ءبىرى. اشكوز كوممەرتسيالىق قۇرىلىس سالۋشىلار ودان تەز پايدا تابۋ ءۇشىن كوزدەيدى، بۇل ەرەكشە تابيعي مۇرانىڭ قامقورشىسى رەتىندە قازاق حالقىنا قارسى قىلمىس قانا ەمەس، سونىمەن قاتار وسى جەردى مەكەندەيتىن جويىلىپ كەتۋ قاۋپى بار تاۋ قوشقارلارى مەن بوكەندەرگە اۋىر سوققى بولادى. دۇرىس ويلاستىرىلماعان جوبا الەمدىك ماڭىزى بار لاندشافتتارعا شابۋىل دەۋگە بولادى. بۇعان كوز جۇمىپ قاراي المايمىز»، - دەپ جازدى پۋليتتسەر سىيلىعىنىڭ ەكى رەت لاۋرەاتى اتانعان جۋرناليست.
ەسكە سالايىق، 2020-جىلعى 7- قاراشادا جەلىدە بوزجىرا شاتقالىندا قۇرىلىس تەحنيكاسى اكەلىنگەنى تۇسىرىلگەن ۆيدەو جاريالاندى. سول كۇنى ماڭعىستاۋ وبلىسىندا Rixos Water World Aktau قوناق ءۇيىن سالعان ينۆەستورلار وبلىس تەرريتورياسىندا «بوزجىرا سافاري-وتەل» بۋتيك- قوناق ءۇيىن سالۋدى ۇسىنعانى بەلگىلى بولدى.
ەكولوگيا، گەولوگيا جانە تابيعي رەسۋرستار مينيسترلىگىندەگىلەر بوزجىراداعى نىساننىڭ قۇرىلىسى زاڭعا سايكەس قوعامدىق تالقىلاۋدان، ەكولوگيالىق ساراپتامادان، قورشاعان ورتاعا اسەرىنىڭ باعالاۋىنان ءوتۋى كەرەك ەكەنىن ايتتى.
ساراپشىلار بوزجىرا شاتقالىندا قۇرىلىسقا تىيىم سالۋدىڭ التى سەبەبىن اتادى.
10- قاراشادا شاتقالدان قۇرىلىس تەحنيكاسى شىعارىلعان.
