فريستايل-موگۋلدان الەم كۋبوگى كەزەڭىنىڭ فينالى: قازاقستاندىقتار جۇلدەسىز قالدى
ايەلدەر اراسىندا اقتىق سىنعا يۋليا گالىشەۆا وتكەن بولاتىن. ول العاشقى فينالدىق كەزەڭدە 78,90 ۇپاي جيناپ، اقتىق سىنعا وتكەن التى سپورتشىنىڭ قاتارىنا ەنگەن ەدى. ال ەڭ باستى فينالدا گالىشەۆا سەكىرۋ ەلەمەنتتەرىنىڭ بىرىنەن قاتە جىبەرىپ، 77.31 ۇپايمەن 5-ورىنعا تۇراقتادى.
ايەلدەر باسەكەسىندە فرانسيالىق پەررين لاففون توپ جاردى. ونىڭ ەنشىسىندە 83,23 ۇپاي بار. ەكىنشى جانە ءۇشىنشى ورىندى جاپونيالىق سپورتشىلار انري كاۆامۋرو (80,94) مەن كيسارا سۋميوشي (79,55) يەلەندى.
ال ەرلەر اراسىندا ەڭ باستى فينالعا جولدامانى دميتري رەيحەرد جەڭىپ الدى. وكىنىشكە قاراي، قازاقستاندىق سپورشى شەشۋشى ساتتە قاتەلىككە بوي الدىرىپ، 74,19 ۇپايمەن 6-ورىن يەلەندى.
بۇل باسەكەدە كانادالىق ميكاەل كينگسبەري (88,10) جەڭىسكە جەتتى. ەكىنشى ورىندا فرانسيالىق بەندجامەن كاۆە (86,25)، ءۇشىنشى ساتىدا اۆستراليالىق مەت گرەم (84,44).
ايتا كەتەيىك، كۆاليفيكاتسيانى قازاقستاننىڭ تاعى ءبىر سپورتشىسى - پاۆەل كولماكوۆ وتكەن بولاتىن. الايدا ول باستى باسەكەگە جولداما الا المادى. ول جارىستى 9-ورىنمەن اياقتادى.
