دۇرىس تاماقتانباۋ قاتەرلى ىسىككە اكەلەدى - ونكولوگ
مامان وبىردان ساقتانۋ ءۇشىن كۇنىنە ەڭ كەمىندە 5 رەت كوكونىس پەن جەمىس جەۋگە كەڭەس بەرەدى، دەپ حابارلايدى قازاقپارات ءتىلشىسى.
س ق و كوپبەيىندى اۋرۋحانانىڭ ونكولوگيالىق ورتالىعىنىڭ راديولوگيا بولىمشەسىنىڭ مەڭگەرۋشىسى حابدىراحمان بەركىمبايەۆتىڭ ايتۋىنشا، قاتەرلى ىسىكتىڭ كەي تۇرلەرىن بەلگىلى ءبىر كەزەڭدە ەمدەپ- جازۋعا بولادى. ءالى كۇنگە دەيىن وبىردىڭ ناقتى نەدەن پايدا بولاتىنى انىقتالعان جوق. الايدا قاۋىپتى دەرتتىڭ الدىن الۋعا بولادى.
«ەڭ ءبىرىنشى كۇتىنۋ قاجەت. ەڭبەك پەن دەمالىستىڭ ارا جىگى بولۋى كەرەك. ارينە، سپورتپەن اينالىسۋدىڭ دەنساۋلىققا تيىمدىلىگىن ايتپاسا دا بولادى. جاعىمسىز ەموتسيالارعا جول بەرمەڭىز جانە ىشەتىن تاماعىڭىزدى جوسپارلاپ ۇيرەنىڭىز»، - دەيدى دارىگەر.
ماماننىڭ ايتۋىنشا، قاتەرلى ىسىككە اكەلەتىن نەگىزگى فاكتورلاردىڭ ءبىرى - دۇرىس تاماقتانباۋ. اۋرۋدان امان بولۋ ءۇشىن تالعاپ جەۋ قاجەت.
«سۇرلەنگەن ونىمنەن، قۋىرىلعان، كونسەرۆىلەنگەن، مارينادتالعان، تۇزدالعان جانە ناتري نيتريتى قوسىلعان تاعامداردان بارىنشا باس تارتقان دۇرىس. قاتتى ىستىق شاي مەن تاماقتى اسا ىستىق كۇيىندە ىشۋگە بولمايدى. الكوگولدەن باس تارتىڭىز. سوڭعى كەزدە سىرانى مولشەردەن كوپ ىشەتىندەر كوبەيگەن. قازىرگى سىرالار وبىردىڭ پايدا بولۋىنا اسەر ەتەدى. سونداي- اق بۇل ىشىمدىك سەمىزدىككە اكەلىپ، اعزاداعى گورموندى تەپە- تەڭدىكتى بۇزادى. چيپسى، پوپكورن، فري كارتوبى دەنساۋلىققا زيان. ال ءبىز ونى ءتىپتى بالالارعا بەرەمىز»، - دەيدى حابدىراحمان بەركىمبايەۆ.
دارىگەر كۇندەلىكتى مازىرگە مىندەتتى تۇردە كوكونىس پەن جەمىستى ەنگىزۋگە كەڭەس بەرەدى. «كوكونىس پەن جەمىس- جيدەكتى، وسىمدىكتەن جاسالعان ونىمدەردى، سونىڭ ىشىندە شىرىندى كۇنىنە ەڭ كەمىندە بەس رەت تۇتىنعان ءجون. بۇرشاق تۇقىمداستاردى، پياز بەن سارىمساقتى، كەپكەن جەمىستەردى، ءسۇت جانە بالىق ونىمدەرىن اس مازىرىنە كىرگىزۋ كەرەك. مايلى تاعامدى ازايتىپ، دەنە سالماعىن قالىپتى دەڭگەيدە ۇستاۋعا تىرىسۋ قاجەت. دۇرىس تاماقتانۋ ناتيجەسىندە اعزاعا قاجەتتى دارۋمەندەردى الىپ قانا قويماي، ەمدەلەمىز دە»، - دەيدى ونكولوگ- دارىگەر.
