ساتيريك كوپەن امىربەك جەمقورلىقپەن كۇرەسكە كاريكاتۋرانى تارتۋدى ۇسىندى

نۇر- سۇلتان. قازاقپارات - سىبايلاس جەمقورلىقپەن كۇرەسكە كاريكاتۋراشىلاردى دا تارتۋ كەرەك. بۇل تۋرالى ق ر ۇلتتىق اكادەميالىق كىتاپحاناسىندا وتكەن «پاراسات جولى» جوباسىنىڭ تانىستىرىلىمىندا ساتيريك كوپەن امىربەك ايتتى، دەپ حابارلايدى قازاقپارات ءتىلشىسى.

«بۇرىن «ارا» ساتيرالىق جۋرنالىنىڭ اتىن ەستىگەن ادام ەلەڭ ەتە قالار ەدى. قوعام جاقسى قاسيەتتەرىنەن ايىرىلىپ قالدى. ستاتيستيكاعا كوز جۇگىرتسەم، مىڭنان استام مەملەكەتتىك قىزمەتكەرگە قاتىستى قىلمىستىق ءىس قوزعالعان»، - دەيدى ساتيريك كوپەن امىربەك.

ول سىبايلاس جەمقورلىققا قارسى جۇمىس اتقارىلىپ جاتقانىن، سول جۇمىستاردىڭ ءبىرى - بۇگىنگى كەزدەسۋ ەكەنىن دە ايتتى.

«بىلتىر 80 ميلليون تۇرعىنى بار گەرمانياعا بارىپ قايتتىم. ول جاقتا سوڭعى 30 جىلدا بىردە ءبىر شەنەۋنىككە قاتىستى قىلمىستىق ءىس قوزعالماعان. مىنە، قايدان ۇلگى الۋ كەرەك! ال ءبىزدىڭ قوعامداعى جاعداي قالاي؟ اقۇشتاپ باقتىگەرەيەۆا دۇرىس ايتادى، قازاقتار بالاسىن قالاي تاربيەلەگەن؟ «بالام، ۇيات بولادى» دەگەن ءۇش- اق اۋىز سوزبەن تاربيەلەگەن. قازاق حالقىندا وسى ماسەلەگە قاتىستى قانشاما ماقال- ماتەل، قاناتتى ءسوز بار»، - دەيدى ول.

ول سىبايلاس جەمقورلىقپەن كۇرەسۋ ءۇشىن وسى تاقىرىپتا جۇمىس ىستەيتىن كاريكاتۋراشىلارعا ارنالعان بايقاۋ ۇيىمداستىرۋعا بولاتىنىن العا تارتادى.

«بۇل ماسەلەگە سىني كوزبەن قاراۋ كەرەك، سول سەبەپتى «ارا» جۋرنالىن قازىرگى زامان تالابىنا ساي جاڭا فورماتتا شىعارا باستاۋ كەرەك. مىسالى، سايت اشۋعا بولادى. پارا الاتىن، جەمقورلىققا جاقىن ادامدارعا قاتىستى كاريكاتۋرادان بايقاۋ وتكىزۋ كەرەك. سوندا جۇمىس العا باسادى. ۇسىنىسىم ورىندى دەپ تاپساڭىزدار - مەن قول ۇشىن سوزۋعا دايىنمىن»، - دەيدى ساتيريك كوپەن امىربەك.