قازاق تىلىندە سويلەمەگەن جاڭا مينيسترگە ەسكەرتۋ جاسالدى

نۇر-سۇلتان. قازاقپارات - ءماجىلىس دەپۋتاتى بەرىك دۇيسەمبينوۆ ۇلتتىق ەكونوميكا ءمينيسترى اسەت ەرعاليەۆكە ەسكەرتۋ جاسادى.

«ءسىز ماجىلىستە ءبىرىنشى رەت بولعاندىقتان، تىلەگىمدى بىلدىرۋگە رۇقسات ەتىڭىز. ءسىز قازاق تىلىندە قويىلعان بارلىق سۇراققا رۇقسات سۇراماي، ورىس تىلىندە جاۋاپ بەرەسىز. جاسىڭىزعا قاراماستان ءسىز 18 ميلليون ادامنىڭ ىشىنەن مينيستر بولۋعا لايىق اتاندىڭىز. ءسىزدى تاۋەلسىزدىكتىڭ قۇرداسى دەسە دە بولادى. ءبىراق سۇراقتارعا انا تىلىڭىزدە جاۋاپ بەرۋگە دايىن بولماۋىڭىز ۇيات. سىزگە ءبىر ءوتىنىشىم بار: انا تىلىندە قويىلعان سۇراقتارعا انا تىلىندە جاۋاپ بەرۋىڭىزدى سۇرايمىن»، - دەدى دەپۋتات بەرىك دۇيسەمبينوۆ ءماجىلىس وتىرىسىندا.

اسەت ەرعاليەۆ ۇلتتىق ەكونوميكا مينيسترلىگىنىڭ باسشىسى بولىپ 2021 -جىلى 18-قاڭتاردا تاعايىندالدى. ول ەڭ جاس قازاقستاندىق مينيستر. ماۋسىمدا 35 جاسقا تولادى.