كوروناۆيرۋس: «بريتاندىق شتامم» تاعى دا مۋتاتسياعا ۇشىرادى

لوندون. قازاقپارات - بريتان عالىمدارى ۇلى بريتانيادا انىقتالعان كوروناۆيرۋستىڭ «بريتاندىق شتامى» جاڭا گەنەتيكالىق وزگەرىستەرگە ۇشىرايدى دەپ الاڭداۋلى.

بۇل تۋرالى قازاقپارات BBC سايتىنا سىلتەمە جاساپ حابارلايدى.

عالىمداردىڭ ايتۋىنشا، ءبىرقاتار پاتسيەنتتەردىڭ جاقىندا جۇرگىزىلگەن تالداۋلارى «وڭتۇستىك افريكالىق» جانە «برازيليالىق» شتامداردا كەزدەسەتىن تاعى ءبىر مۋتاتسيا - E484K بەلگىلەرىن كورسەتتى.

بۇل مۋتاتسيا قولدانىستاعى ۆاكتسينالاردى ءتيىمسىز ەتۋى مۇمكىن، ءبىراق ازىرگە يممۋنيزاتسيا جوسپارلانعان تۇردە جۇرگىزىلۋى كەرەك دەيدى ماماندار.

ۇلى بريتانيا بيلىگى قازىردىڭ وزىندە ءبىرقاتار شارالار قابىلدادى، اتاپ ايتقاندا، Covid-19 جاپپاي تەستىلەۋ ناۋقانى باستالدى.

شارا بارىسىندا ارنايى بريگادالار ۆيرۋستىڭ سوڭعى نۇسقالارى انىقتالعان اۋداندارداعى ۇيلەردى ارالاپ، ادامنىڭ اۋرۋ بەلگىلەرى بار-جوعىنا قاراماستان سىناقتار جۇرگىزەدى.

ءبىرىنشى كەزەڭدە ەلدىڭ سەگىز اۋدانىندا 80 مىڭ ادامدى سىناقتان وتكىزۋ جوسپارلانۋدا. بريتان بيلىگىنىڭ ايتۋىنشا، بۇل قادام جاڭا، اسا جۇقپالى سانالاتىن وڭتۇستىك افريكالىق شتاممنىڭ تارالۋىن باقىلاۋعا كومەكتەسەدى.

ەسكە سالساق، كوروناۆيرۋستىڭ جاڭا شتامى الەمنىڭ كوپتەگەن ەلدەرىندە انىقتالدى. ول جايلى نە ءبىلۋىمىز كەرەك. قازاقستاننىڭ باس سانيتارلىق دارىگەرىنىڭ ايتۋىنشا، بريتاندىق كوروناۆيرۋس شتامى ءبىزدىڭ ەلدە تىركەلگەن جوق.