تۇلكىباس اۋدانىندا جاڭا اربات بوي كوتەرەدى

تۇركىستان. قازاقپارات - بيىل تۇلكىباس اۋدانىنىڭ ورتالىعى ت. رىسقۇلوۆ اۋىلىندا جاڭا اربات بوي كوتەرمەك.

قازىرگى تاڭدا جەردى تەگىستەۋ جۇمىستارى جۇرۋدە. اعىمداعى جىلدىڭ مامىر ايىندا قۇرىلىس جۇمىستارى تولىق اياقتالادى، دەپ حابارلايدى وبلىستىق اكىمدىكتىڭ باسپا ءسوز قىزمەتى.

دەمالىس ورنى - اۋداندىق مادەنيەت ءۇيىنىڭ الدىنداعى «قۇرمەتتى ازاماتتار» اللەياسىنىڭ ورنىنا تۇسپەك.

ال، «قۇرمەتتى ازاماتتار» اللەياسى جاڭا ديزايندا «جەتى قازىنا» اللەياسىنىڭ اۋماعىنان بوي كوتەرەتىن بولادى.

اۋدان ورتالىعىنىڭ كوركىن اشا تۇسەتىن ارباتتىڭ قوس قاپتالىنداعى جاياۋ جۇرگىنشى جولى مەن ساياجولعا ءتۇرلى-ءتۇستى بەدەرلى تاس توسەلمەك.

سونداي-اق، جاڭا ورىندىقتار قويىلىپ، شامدار ىلىنەدى. جەرگىلىكتى فاۋناعا ساي ساۋلەتتى مۇسىندەر ورناتىلاتىن بولادى.

قۇرىلىس جۇمىستارى اياقتالىپ، پايدالانۋعا بەرىلگەن كەزدە، اۋىل تۇرعىندارىنىڭ دەمالىس ايماعىنا اينالماق.