جازۋشى انەس ساراي دۇنيەدەن وزدى

نۇر- سۇلتان. قازاقپارات - جازۋشى، مەملەكەتتىك سىيلىقتىڭ يەگەرى انەس ساراي دۇنيەدەن ءوتتى.

سۋىق حابار تۋرالى «ەگەمەن قازاقستان» گازەتىنىڭ باسقارما باسشىسى، حالىقارالىق تۇركى اكادەمياسىنىڭ پرەزيدەنتى دارحان قىدىرالى الەۋمەتتىك جەلىدە جازدى، دەپ حابارلايدى قازاقپارات.

قازاقستاننىڭ ەڭبەك سىڭىرگەن قايراتكەرى انەس ساراي تولەندى ۇلى 1937 -جىلدىڭ 21 -قاراشاسىندا رەسەي فەدەراتسياسىنىڭ استراحان وبلىسىنا قاراستى ۆولودار اۋدانىنىڭ قۇرمالاي اۋىلىندا دۇنيەگە كەلگەن. جازۋشى تاعدىر تالكەگىمەن قازاق توپىراعىنان جىراقتا قالسا دا، تەربەلىپ وسكەن تال بەسىگى اتىراۋ ءوڭىرى. تەڭىز جاعاسىندا قانات قاتايتقاندىقتان با، 1963 -جىلى جارىق كورگەن «داۋىلدا» اتتى تىرناق الدى اڭگىمەسىنەن باستاپ «ەدىل- جايىق» تريلوگياسىنا دەيىنگى بارلىق شىعارمالارى تەڭىز تاقىرىبىنا ارنالىپ كەلدى. ءتىپتى، جازۋشى قازاق ادەبيەتىندە «تەڭىز جىرشىسى» اتانىپ تا كەتتى. «ەگەمەن قازاقستان»، «جاس الاش» گازەتتەرىندە ادەبي قىزمەتكەر، ءبولىم مەڭگەرۋشىسى، «جازۋشى» باسپاسىندا رەداكتور، قازاقستان جازۋشىلار وداعىندا ادەبي كەڭەسشى بولىپ قىزمەت اتقارعان. ول الاش كوزعالىسىنا قاتىستى دەرەكتى ماتەريالداردىڭ اۆتورى، سوڭعى جىلدارى قازاق تاريحىنىڭ اقتاڭداق بەتتەرىنە قالام تارتۋمەن كوزگە ءتۇستى.