الەمدە ۆيرۋستى جۇقتىرعاندار سانى ازايىپ كەلەدى - دۇنيەجۇزىلىك دەنساۋلىق ساقتاۋ ۇيىمى

نۇر-سۇلتان. قازاقپارات - كوروناۆيرۋستىڭ ءتۇرلى جاڭا شتامدارى پايدا بولىپ جاتقانىنا قاراماستان، ىندەتتى باقىلاۋعا الۋعا بولادى.

دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس گەبرەيەسۋس كەزەكتى باسپا ءسوز ءماسليحاتىندا وسىلاي دەپ مالىمدەدى، دەپ حابارلايدى «حابار 24».

ونىڭ ايتۋىنشا، بۇل ءۇشىن بەتپەردە تاعۋ، الەۋمەتتىك اراقاشىقتىق سىندى ساقتىق شارالاردى ساقتاۋدى جالعاستىرا بەرۋ قاجەت. مىسال رەتىندە ۇيىم باسشىسى سوڭعى ءۇش اپتادا الەمدە ۆيرۋستى جۇقتىرعاندار سانى ازايىپ كەلە جاتقانىن اتاپ ءوتتى.

«حالىقارالىق قاۋىمداستىق بۇعان دەيىن مۇنداي ناتيجەگە شەكتەۋلەردى ەرتە الىپ تاستاۋدان قولجەتكىزە الماپ ەدى»، - دەيدى ول.

تەدروس ادحانوم گەبرەيەسۋس، د د س ۇ باسشىسى:

- سوڭعى مالىمەتتەر كوروناۆيرۋس مۋتاتسياعا ۇشىراپ، جاڭا شتامداردىڭ پايدا بولعانىنا قاراماستان، ىندەتتى باقىلاۋعا الۋعا بولاتىنىن كورسەتىپ وتىر. ياعني ەگەر ءبىز وسى ۋاقىتقا دەيىن ءوزىنىڭ تيىمدىلىگىن كورسەتكەن سانيتارلىق شارالاردى جالعاستىرساق، ادامداردىڭ دەرتكە شالدىعۋىن ازايتۋعا قولجەتكىزە الامىز.

ايتا كەتەيىك، بۇعان دەيىن وسى ۇيىمنىڭ توتەنشە جاعدايلار جونىندەگى ديرەكتورى مايكل رايان «كوروناۆيرۋستى تولىقتاي جەڭۋ قيىنعا سوعادى» دەپ مالىمدەگەن. وعان دەرتكە قارسى ۆاكسينانىڭ ەلدەر اراسىندا تەڭ بولىنبەۋى سەبەپ بولادى دەپ كورسەتكەن ەدى. سونداي- اق ۆيرۋسقا قارسى ەكپەنىڭ جاپپاي جۇرگىزىلمەۋى دە كەسەلدى جەڭۋگە كەدەرگى بولاتىنىن ايتقان.