نەسيە تاريحىنىڭ ناشار بولۋى زەينەتاقى جيناعىن پايدالانۋعا اسەر ەتە مە
تىلشىلەردىڭ بۇل سۇراعىنا ورتالىق كوممۋنيكاتسيالار الاڭىندا وتكەن باسپا ءسوز ءماسليحاتىندا «وتباسى بانك» ا ق باسشىسى ءلاززات يبراگيموۆا جاۋاپ بەردى، دەپ حابارلايدى قازاقپارات ءتىلشىسى.
«ناشار نەسيە تاريحى ءبىر رەتتىك زەينەتاقى تولەمىن بەرۋدەن باس تارتۋعا سەبەپ بولمايدى. بۇل جاعدايلار ءبىر- بىرىنە مۇلدە بايلانىستى ەمەس. ەكىنشى كەزەڭدە، ياعني قاراجات ءسىزدىڭ ارنايى شوتىڭىزعا تۇسكەننەن كەيىن ەگەر ماقساتتاردىڭ ءبىرى - جاڭا يپوتەكالىق نەسيە الۋ بولسا، وندا ءسىز ەكىنشى دەڭگەيلى بانكتەرگە ەڭ قولايلى جاعدايلاردى ىزدەۋگە باراسىز. ءدال سول كەزدە كوبى (بانكتەردىڭ) ءسىزدىڭ قارىزدارىڭىزدى بۇعان دەيىن قالاي تولەگەنىڭىزدى تالداۋى مۇمكىن»، - دەپ ءتۇسىندىردى ول.
ال «وتباسى بانك» تۋرالى ءسوز قوزعاعان ءلاززات يبراگيموۆا بۇل ماسەلەدە ءوزى جەتەكشىلىك ەتىپ وتىرعان بانكتىڭ ساياساتى قانداي ەكەننىن دە ايتىپ ءوتتى.
«ەگەر ءوتىنىم بەرەر الدىندا ءبىر كۇن بۇرىن عانا باسقا بانك الدىنداعى مەرزىمى ءوتىپ كەتكەن نەسيەنى جاپساڭىز، ەكىنشى دەڭگەيلى بانكتەرمەن قارىم- قاتىناسىڭىزعا ءبىز قارامايمىز. ءبىزدىڭ نارىقتىق باعدارلامالارعا سايكەس، قارىزدى تولەگەننەن كەيىن، ءبىز جاڭا پروبلەمالىق قارىزدار تۋرالى باسقا وقيعالار بولماس ءۇشىن ءۇش اي كۇتەمىز. بۇل جاعدايدا، ءسىز باسقا بانكتەگى قارىزىڭىزدى تولەگەننەن كەيىن 90 كۇن وتكەن سوڭ، ءسىزدىڭ نەسيە تاريحىڭىزدا ماسەلە تۋىندامايدى»، - دەپ قوستى ءلاززات يبراگيموۆا.
ەسكە سالساق، 2021 -جىلى 2 -قاڭتاردا ق ر پرەزيدەنتى قاسىم-جومارت توقايەۆ زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتاردىڭ زەينەتاقى جيناقتارىن پايدالانۋ ءۇشىن جاڭارتىلعان «جەتكىلىكتىلىك شەگى» جاريالاندى.
زەينەتاقى جيناعىنان الۋعا بولاتىن سوما بجزق سايتىندا اۆتوماتتى تۇردە كورسەتىلەدى. 23 -قاڭتاردان قازاقستاندا زەينەتاقىنىڭ ءبىر بولىگىن الۋعا ءوتىنىم قابىلداۋ باستالدى. ارنايى پورتالدا زەينەتاقىنىڭ ءبىر بولىگىن الۋعا ءوتىنىم قابىلداۋ باستالعالى ءۇش ساعاتتىڭ ىشىندە 4 مىڭنان استام ادام ءوتىنىش بەردى.
