وتكەن جىلى ەكونوميكالىق قىلمىس كۇرت وسكەن - زەرتتەۋ

بۇل تۋرالى قازاقپارات finprom.kz سىلتەمە جاساپ حابارلايدى.

«وسى قىلمىستاردىڭ سالدارىنان كەلتىرىلگەن ماتەريالدىڭ شىعىن كولەمى 165 ميلليارد تەڭگەگە جەتتى. بۇل - الدىڭعى جىلدىڭ كورسەتكىشىمەن سالىستىرعاندا 2,6 ەسە كوپ سوما. اتاپ ايتقاندا مەملەكەتكە 155,2 ميلليارد تەڭگە، ال جەكە تۇلعالارعا 6,4 ميلليارد تەڭگە، ال زاڭدى تۇلعالارعا 3,3 ميلليارد تەڭگە شىعىن كەلتىرىلگەن. 2020 -جىلدىڭ قاڭتارى مەن جەلتوقسانى ارالىعىندا ەكونوميكالىق باعىتتا 1,3 مىڭ قىلمىس تىركەلدى. بۇل كورسەتكىش - الدىڭعى جىلعىمەن سالىستىرعاندا %22,9 عا ارتىق»، - دەلىنگەن زەرتتەۋدە.

ايماقتاردى ءبولىپ قاراعاندا ەكونوميكالىق قىلمىستاردىڭ كوبى الماتى قالاسىندا تىركەلگەن (240 جاعداي - الدىڭعى جىلمەن سالىستىرعاندا 37,9 پايىزعا ارتىق). تىزىمدە ودان كەيىن شىمكەنت (208 جاعداي - الدىڭعى جىلمەن سالىستىرعاندا 2,1 ەسە كوپ) جانە قاراعاندى وبلىسى (115 جاعداي - الدىڭعى جىلمەن سالىستىرعاندا +53,3 پايىز) تۇر ال وسى قىلمىستاردىڭ ازايۋ كورسەتكىشى 17 ءوڭىردىڭ 7 ەۋىندە بايقالعان. ماسەلەن، قىزىلوردا وبلىسىندا بۇل كورسەتكىش ءۇش ەسە ازايسا، قوستاناي وبلىسىندا ءتورت ەسە تومەندەگەن.