قازاقستاندا ءبىر اي ىشىندە قانشا كولىك تىركەلدى
بۇل تۋرالى «قازاۆتوونەركاسىپ» اۆتوكولىك سالاسىنداعى كاسىپورىندار وداعىنان ءمالىم ەتتى، دەپ حابارلايدى قازاقپارات.
«ەسەپتى كەزەڭدە اكىمشىلىك پوليتسيا ورگاندارى 118592 اۆتوكولىكتى تىركەۋگە قويدى. اتالعان كورسەتكىش وتكەن جىلدىڭ سايكەس كەزەڭىنەن 7 پايىزعا ارتىق. ونىڭ ىشىندە 107171 ى بىرنەشە رەت تىركەلگەندەر ۇلەسىندە، ياعني ءبىر ادامنان ەكىنشى ادامنىڭ اتىنا اۋىستىرىلعان كولىكتەر ساناتىنا جاتقىزىلدى. ءبىر جىل بۇرىنعى دەڭگەيمەن سالىستىرعاندا 3,3 پايىزعا ءوستى. ال العاش رەت تىركەلگەن كولىك قۇرالدارىنىڭ سانى ارتىپ، 11421 دى قۇرادى. بۇل كورسەتكىش بىلتىرعا قاراعاندا 62 پايىز جوعارى. 2020 -جىلعى جەلتوقسان ايىمەن سالىستىرعاندا بيىلعى قاڭتاردا تىركەلگەن كولىكتەر سانى 18,2 پايىزعا تومەن بولدى»، - دەپ اتاپ كورسەتىلگەن تاراتىلعان مالىمەتتە.
2020 -جىلدىڭ قورىتىندىسى بويىنشا قازاقستان اۋماعىندا 12 جەڭىل ەلەكتروموبيل تىركەلگەن.
«قازاۆتوونەركاسىپتىڭ» حابارلاۋىنشا، ەسەپتى كەزەڭدە قايتا تىركەلگەن كولىكتەردىڭ ۇشتەن ەكىسىنەن استامىن (68,2 پايىزى) پايدالانۋ مەرزىمى 10 جىلدان اسقان كولىكتەر قامتىعان. اتاپ ايتقاندا، 20 جىلدان اسقانداردىڭ ۇلەسى - 45460 كولىك (42,4 پايىز) بولسا، 11 دەن 20 جىلعا دەيىنگىلەر - 25,8 پايىز (27 655 كولىك).
ال 4 تەن 7 جىلعا دەيىنگىلەر - 12293 كولىككە (11,5 پايىز)، 8 دەن 10 جىلعا دەيىنگىلەر - 15588 كولىككە (14,5 پايىز)، 1 دەن 3 جىلعا دەيىنگى كولىك سانى 6131 گە جەتتى.
سونىمەن قاتار، پايدالانۋ مەرزىمى 1 جىلعا جەتپەگەن كولىكتەردىڭ ۇلەسى 0,04 پايىز (44 اۆتوموبيل) بولدى.
