بيىل كۇزدەگى حالىق ساناعى قالاي وتەدى
29-قاڭتاردا رەفورمالار جونىندەگى جوعارى كەڭەستىڭ ءۇشىنشى وتىرىسىندا مەملەكەت باسشىسى قاسىم- جومارت توقايەۆ حالىق ساناعىن قازان ايىندا وتكىزۋدى تاپسىرعان ەدى.
«پرەزيدەنت جانىنداعى رەفورمالار جونىندەگى جوعارى كەڭەستىڭ شەشىمىمەن حالىق ساناعى بيىل وتەدى. 2021 -جىلعى جاڭا ساناقتىڭ ەرەكشەلىگى - زاماناۋي تسيفرلىق تەحنولوگيالاردى ەنگىزۋ مەن پروتسەستى اۆتوماتتاندىرۋ. ەندى حالىقتان مالىمەت جيناۋ ەكى ءتۇرلى تاسىلمەن جۇرگىزىلەدى. ءبىرىنشى ءتاسىل - https://sanaq.gov.kz/ ارنايى سايتىندا ينتەرنەت- ساۋالناما جۇرگىزۋ، وندا ۆيرتۋالدى كومەكشى ارقىلى رەسپوندەنتتەر قاي جەردە ورنالاسقانىنا قاراماستان دەربەس ساناقتان وتۋگە جانە ءوزى مەن وتباسى مۇشەلەرىنە ساناق پاراقتارىن تولتىرۋعا مۇمكىندىك الادى»، - دەپ اتاپ ءوتتى قايرات كەلىمبەتوۆ ۇكىمەتتىڭ بۇگىنگى وتىرىسىندا.
ەكىنشى ءتاسىل - قاجەتتى سانيتارلىق نورمالاردى ساقتاي وتىرىپ، ءداستۇرلى ءۇي-ءۇيدى ارالاۋ. ارالاۋ ونلاين رەجيمدە ساناقتان وتپەگەن رەسپوندەنتتەر اراسىندا جۇرگىزىلەدى.
«ينتەرۆيۋەرلەردىڭ جاپپاي ارالاۋ كەزىندە ەلەكتروندىق پلانشەتتەردى پايدالانۋى دا جاڭالىق بولىپ وتىر، بۇل پلانشەتتەر كەيىن ءتيىستى وڭىرلەردەگى مەكتەپتەرگە بەرىلەدى. ۇيلەردى ارالاۋ 1-30 -قازان ارالىعىندا وتەدى. قازىرگى ۋاقىتتا ۇلتتىق ساناقتى وتكىزۋ جونىندەگى ءىس- شارالار جوسپارى مۇددەلى مەملەكەتتىك ورگاندارعا جانە وبلىستاردىڭ اكىمدىكتەرىنە كەلىسۋگە جىبەرىلدى»، - دەپ ءتۇسىندىردى ق. كەلىمبەتوۆ.
