ەلوردادا قانشا ادام ۆاكسينالاناتىنى بەلگىلى بولدى
بۇل تۋرالى نۇر- سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسى بويىنشا حالىقتى كوروناۆيرۋس ينفەكسياسىنا قارسى كەزەڭ- كەزەڭىمەن ەگۋ ۆاكسينانىڭ تۇسۋىنە بايلانىستى وسى جىلدىڭ 1-اقپانىنان باستالدى. ۆاكسيناتسيا 18 دەن 64 جاسقا دەيىنگى ادامدارعا جاسالادى. نۇر-سۇلتاندا وسى ساناتقا كىرەتىن 735 مىڭ ادام بار. ۆاكسيناتسيا ەرىكتى نەگىزدە جانە ءار ازاماتقا تەگىن جاسالادى. تۇراقتى پروفيلاكتيكالىق ەگۋلەرگە جانە ۋاقىتشا مەديتسينالىق قارسى كورسەتىلىمدەرى بار ادامدارعا ك ۆ ي- عا قارسى ەكپە سالىنبايدى. سونداي- اق، كوروناۆيرۋستىڭ اۋىر جاعدايى جانە سيمپتومسىز بەلگىلەرى بار ادامدار ەكپە الۋعا جاتپايدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ اتاپ وتۋىنشە، جۇقپالى اۋرۋى بار، ونىڭ ىشىندە ك ۆ ي- مەن اۋىرعان ناۋقاسپەن بايلانىستا بولعان ادامدار كارانتين مەرزىمى اياقتالعاننان كەيىن عانا ۆاكسينالانادى.
«ەكپە سالۋ الدىندا COVID-19 قارسى انتيدەنەلەردىڭ بار- جوعىن انىقتاۋ ءۇشىن سكرينينگ جاسالمايتىنىن اتاپ وتكىم كەلەدى. كوروناۆيرۋس ينفەكسياسىنىڭ كەز كەلگەن فورماسىمەن اۋىرعان پاتسيەنت ەمدەلىپ شىققاننان كەيىن دەنساۋلىق جاعدايىنا بايلانىستى كەمىندە 6 ايدان كەيىن ەكپە العانى دۇرىس. ۆاكسينانى قابىلداۋعا قارسى كورسەتىلىمدەر - ۆاكسينانىڭ كەز كەلگەن كومپونەنتىنە جوعارى سەزىمتالدىق، اۋىر اللەرگيالىق رەاكسيالار. جۇكتى ايەلدەر جانە بالا ەمىزەتىن انالارعا ۆاكسينا الۋعا بولمايدى. ەكپە بالالارعا جانە 65 جاستان اسقان ادامدارعا سالىنبايدى»، - دەدى تيمۋر مۇراتوۆ.
