قازاقستاندىقتار لوكداۋنسىز ومىرگە ورالۋ ءۇشىن قانشا ادام ۆاكسينا الۋى قاجەت

نۇر-سۇلتان. قازاقپارات - ق ر دەنساۋلىق ساقتاۋ ۆيتسە- ءمينيسترى - باس مەملەكەتتىك سانيتار دارىگەر ەرلان قياسوۆ لوكداۋنسىز ومىرگە ورالۋ ءۇشىن قانشا قازاقستاندىق ۆاكسينا الۋى قاجەت ەكەنىن ءتۇسىندىردى، دەپ حابارلايدى قازاقپارات ءتىلشىسى.

ەلورداداعى №6-قالالىق ەمحانادا ق ر دەنساۋلىق ساقتاۋ ۆيتسە- ءمينيسترى - باس مەملەكەتتىك سانيتار دارىگەر ەرلان قياسوۆ پەن دەنساۋلىق ساقتاۋ ۆيتسە- ءمينيسترى اجار عينيات كوروناۆيرۋسقا قارسى ۆاكسينا سالدىردى. تىلشىلەر باس سانيتاردان ۆاكسينالاۋدىڭ قانداي وڭ اسەرى بولاتىنىن سۇرادى.

«ەگەر حالىقتىڭ كەم دەگەندە %50 ى ۆاكسينا السا، يممۋندىق قابات پايدا بولادى. وسىلايشا، ەش شەكتەۋسىز، كارانتينسىز، لوكداۋنسىز قالىپتى ومىرگە ورالا الامىز. ۆاكسينالاۋدىڭ ەڭ باستى ناتيجەسى وسى بولادى»، - دەپ جاۋاپ بەردى ەرلان قياسوۆ №6-قالالىق ەمحانادا تىلشىلەرگە بەرگەن سۇحباتىندا.

سونىمەن بىرگە، ە. قياسوۆ جىل سوڭىنا دەيىن 6 ميلليون ادامدى ۆاكسينامەن قامتاماسىز ەتۋ جوسپارلانعانىن اتاپ ءوتتى.

«جالپى، ەگۋ جۇمىستارى ءۇشىن 10 ميلليون ازاماتقا دەيىن ەسەپتەلگەن سانداردى الدىق. ءبارىنىڭ ۆاكسينا العانىن قالار ەدىك، ويتكەنى كوروناۆيرۋستىڭ قانداي قاۋىپتى ينفەكسيا ەكەنىن بىلەسىزدەر. بارلىعىن ۆاكسينا الۋعا شاقىرۋعا تىرىسامىز»، - دەيدى ە. قياسوۆ.

اۆتور: ايجان سەرىكجان قىزى