ۆاكسينانىڭ ءبىرىنشى دوزاسى سالىنعان سوڭ كارانتيندە وتىرۋ قاجەت پە

نۇر-سۇلتان. قازاقپارات - ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ەرلان قياسوۆ ۆاكسينانىڭ ءبىرىنشى دوزاسىنان كەيىن كارانتينگە وقشاۋلانۋدىڭ قاجەتى جوق ەكەنىن ءتۇسىندىردى، دەپ حابارلايدى قازاقپارات ءتىلشىسى.

كوروناۆيرۋسقا قارسى ۆاكسينانى 21 كۇندىك ارالىقپەن ەكى كەزەڭمەن ەنگىزۋ كەرەك. ءبىرىنشى دوزا انتيدەنەلەردىڭ از مولشەرىن وندىرۋگە بايلانىستى قىسقا قورعانىس اسەرىن بەرەدى. ەكىنشى دوزا ءبىرىنشىسىنىڭ اسەرىن كۇشەيتەدى جانە نىعايتادى، ادام ورگانيزمىندەگى انتيدەنەلەر سانى ارتادى.

«ءبىرىنشى دوزانى العان سوڭ كارانتينگە وقشاۋلانۋدىڭ قاجەتى جوق. مەن قازىر جۇمىسقا بارامىن. ۆاكسينادان كەيىنگى كۇتىمدى ۇستانۋعا تىرىسامىن. دەگەنمەن بارشاڭىزدى كارانتين رەجيمىن ساقتاۋعا شاقىرعىم كەلەدى، ويتكەنى ادام ۆاكسينا السا دا، كەيبىر جاعدايلاردا بەلگىلى ءبىر ۆيرۋستاردىڭ تاسىمالداۋشىسى بولۋى مۇمكىن. ۆاكسينالاۋ ارقىلى ەڭ الدىمەن ءوزىڭىزدى قورعايسىز، ءوز اعزاڭىزدىڭ ۆيرۋس جۇقتىرۋ مۇمكىندىگىن ازايتاسىز. ءبىراق ءسىز اعزاڭىزدى وزىڭىزگە شابۋىل جاساي الاتىن ۆيرۋستاردان بوساتپايسىز. بۇل ۆاكسينا ءسىزدىڭ دەنەڭىزدى اۋرۋلاردان قورعايدى»، - دەپ ءتۇسىندىردى ەرلان قياسوۆ №6-قالالىق ەمحانادا تىلشىلەرگە بەرگەن سۇحباتىندا.

ەسكە سالا كەتسەك، ەلورداداعى №6-قالالىق ەمحانادا ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ەرلان قياسوۆ پەن دەنساۋلىق ساقتاۋ ۆيتسە-ءمينيسترى اجار عينيات كوروناۆيرۋسقا قارسى ۆاكسينا سالدىردى.

اۆتور: ايجان سەرىكجان قىزى