انگليادا ميگرانتتارعا ارنالعان ورتالىقتا بۇلىك شىعىپ، نىساندار ورتەندى

لوندون. قازاقپارات - انگليانىڭ كەنت گرافتىعىندا زاڭسىز ميگرانتتاردى ورنالاستىرۋ ورتالىعىن ورتەدى دەگەن كۇدىككە ىلىنگەن بەس ادام ۇستالدى.

لاگەردىڭ تۇرعىندارى اۋەلى اسحانانىڭ استان- كەستەنىن شىعارىپ، ودان كەيىن عيماراتتاردىڭ بىرىنەن ءورت شىققان، دەپ حابارلايدى قازاقپارات.

قۇقىق قورعاۋشىلار ەلدىڭ ىشكى ىستەر مينيسترلىگىن ميگرانتتارمەن قاتال بولدى دەپ ايىپتاپ وتىر. لاگەردىڭ باسشىسى پريتي پاتەل كەرىسىنشە ميگرانتتار وسى ارەكەتىمەن بريتاندىق سالىق تولەۋشىلەردى شىعىنعا ۇشىراتتى دەپ مالىمدەدى. گرافتىق پوليتسياسى وكىلىنىڭ ايتۋىنشا، ءتارتىپ ساقشىلارى لاگەر كەڭسەسى وكىلدەرىمەن بىرگە وقيعاعا جاۋاپتى ادامداردىڭ ءتىزىمىن جاساپ جاتىر. بۇعان دەيىن پوليتسيادا ميگرانتتار توبى شىعارعان تارتىپسىزدىك كەزىندە لاگەر ورنالاسقان بۇرىنعى كازارما عيماراتتارىنىڭ ءبىرى قاتتى بۇلىنگەنىن مالىمدەدى. جۇما كۇنى تولقۋ وتكەن ۋاقىتشا ۇستاۋ ورتالىعى لوندوننان وڭتۇستىك- شىعىسقا قاراي فولكستون قالاسىنداعى ەسكى كازارمالار عيماراتىندا ورنالاسقان.

قىركۇيەك ايىنان بەرى وندا پانا سۇراپ كەلگەن جانە زاڭسىز 400 گە جۋىق ميگرانت تۇرىپ جاتىر. ولاردىڭ كوبى نەگىزىنەن فرانتسيانىڭ كالە قالاسىنان كەلدى. كەشكە ميگرانتتاردىڭ ءبىر بولىگى ورتالىق اسحاناسىنىڭ تاس تالقانىن شىعارىپ، كازارما كەشەنىنىڭ تەرەزەلەرىن سىندىردى. كۇزەت قىزمەتكەرىنە شابۋىل جاسالعانى تۋرالى دا حابارلاندى. وقيعا ورنىنا ءورت سوندىرۋشىلەر مەن پوليتسيا شاقىرىلدى. ىشكى ىستەر مينيسترلىگىنىڭ ەسەبىندە كازارما كەشەنى عيماراتتارىنىڭ ءبىرى جويىلعانى تۋرالى ايتىلعان. ابىروي بولعاندا، تارتىپسىزدىكتەر كەزىندە ەشكىم زارداپ شەككەن جوق. كەنت گرافتىعى پوليتسياسىنان حابارلانعانداي، كۇزەتشىگە شابۋىل جاساۋدا ءبىر ادام، ال ءورتتىڭ شىعۋىنا قاتىسى بار تاعى ءتورت ادام ۇستالدى. پوليتسيادا بۇل جاعدايدى جاپپاي تارتىپسىزدىك دەپ سانامايتىنىن، ءبىراق ءورتتىڭ شىعۋىن ادەيى ورتەۋ دەپ تەرگەپ جاتقانىن اتاپ ءوتتى.