كوروناۆيرۋسپەن اۋىرعان بالالاردىڭ يممۋنيتەتىن قالاي كوتەرۋگە بولادى
«الەم عالىمدارى COVID-19-دىڭ ادام اعزاسىنا اسەرى مەن اۋرۋدان كەيىنگى سالدارى بويىنشا ۇزدىكسىز زەرتتەۋلەر جۇرگىزۋدە. كوپتەگەن دارىگەرلەردىڭ باقىلاۋى بويىنشا، COVID-19 ەرەسەكتەرگە قاراعاندا بالالاردا جەڭىل وتەدى. بالالاردا قىزۋ، مۇرىننىڭ بىتەلۋى، تاماقتىڭ اۋرۋى جانە جوتەل بايقالادى. جرۆي- مەن ۇقساستىعىنا بايلانىستى، بالادا COVID-19 بار- جوعىن تەست جاساماي انىقتاۋ وتە قيىن. كوپتەگەن جاعدايلاردا بالالار اراسىندا COVID-19 جاعدايلارى ەپيدەميولوگيالىق كورسەتكىشتەر بويىنشا تەكسەرۋ كەزىندە، جوسپارلى ەمدەۋگە جاتقىزۋ بارىسىندا انىقتالادى»، - دەپ جازدى دەپارتامەنت Facebook-تەگى پاراقشاسىندا.
ۇيىمنىڭ حابارلاۋىنشا، بالاعا جرۆي- مەن اۋىرعان كەزىندەگىدەي كۇتىم جاساۋ ماڭىزدى. ەگەر بالادا كوروناۆيرۋس ينفەكتسياسىنىڭ جەڭىل ءتۇرى بولسا، ونى ارنايى ەمدەۋ قاجەت ەمەس. قاۋىپسىزدىك رەجيمىن ساقتاپ، جەڭىل تاماقتانىپ، جىلى سۋسىندى كوپ ءىشۋ قاجەت. ادەتتە، قۇرامىندا س، ۆ، D ۆيتاميندەرى بار جەمىستەر مەن كوكونىستەردى تۇتىنۋ ۇسىنىلادى. بالالاردا اسقىنۋلار، پنيەۆمونيا از كەزدەسەدى، اۋرۋحاناعا جاتقىزۋ جاعدايى وتە سيرەك تۋىندايدى. ەگەر بالالاردا اۋرۋدان كەيىن اسقىنۋلار پايدا بولسا، كوبىنەسە ۆيرۋستىڭ وزىنەن ەمەس، ءدارى- دارمەكتى قولدانۋ اسەرىنەن بولادى. بۇل ۆيرۋس تامىرلاردى زاقىمدايتىندىقتان، بالالاردا مازاسىزدىق، دەپرەسسيا، شارشاۋ پايدا بولۋى مۇمكىن. سونىمەن قاتار، ينفەكتسيا سالدارى تولىعىمەن بەلگىسىز: كوروناۆيرۋس جۇيكە، ەندوكريندىك جانە رەپرودۋكتيۆتى جۇيەلەرگە دە اسەر ەتۋى مۇمكىن.
«نارەستەلەر COVID-19-بەن سيرەك اۋىرادى. ولاردا جەڭىل تۇردە ءوتىپ، تەمپەراتۋرا جانە ازداعان جوتەل بولۋى مۇمكىن. بۇل جاعدايدا كوبىنەسە اناسىنىڭ يممۋنيتەتىنە بايلانىستى. ەگەر اناسىندا جاقسى يممۋنيتەت بولسا، بالا ءومىرىنىڭ ءبىرىنشى جىلىندا ونىڭ انتيدەنەلەرى كوپتەگەن ينفەكسيالاردان قورعايدى. ەڭ باستىسى - بوتەن ادامداردىڭ نارەستەمەن قارىم- قاتىناسىن ازايتۋ قاجەت. بوتەن ادامدارمەن قارىم- قاتىناستا سابيلەر ءجيى سترەسس الادى، بۇل ولاردىڭ يممۋنيتەتىنە تەرىس اسەر ەتەدى. ازىرگە بالالار اراسىندا كوروناۆيرۋس ينفەكتسياسىنىڭ سالدارى تۋرالى ناقتى اقپارات جوق. اۋرۋدان كەيىن بالالار اعزاسىنىڭ كۇش- قۋاتىن تولىقتىرىپ، دۇرىس تاماقتانىپ، بەلسەندى دەمالىپ جانە بالالاردىڭ جاس ساناتىنا قاراي كۇن ءتارتىبىن ساقتاۋ كەرەك. COVID-19 قايتا جۇقتىرماۋ ءۇشىن بارلىق الدىن- الۋ شارالارىن ساقتاي وتىرىپ، بالالاردىڭ دەنساۋلىعىن ساقتاۋ قاجەت»، - دەيدى نۇر- سۇلتان قالاسىنىڭ سانيتارلىق- ەپيدەميالىق باقىلاۋ دەپارتامەنتى.
