ا ق ش- تىڭ جاڭا پرەزيدەنتى: بۇل - ۇلى مەملەكەت جانە ءبىز - جاقسى ادامدارمىز

78 جاستاعى د. بايدەن ەلدىڭ ەڭ قارت باسشىسى بولىپ وتىر. ول بۇعان دەيىن 36 جىل سەناتور، 8 جىل ۆيتسە-پرەزيدەنت قىزمەتىن اتقاردى. ۇلىقتاۋ راسىمىندە پرەزيدەنت رەتىندە انت بەرىپ، ا ق ش كونستيتۋتسياسىن جانە ەلدى ىشكى جانە سىرتقى جاۋلاردان قورعاۋعا سەرت ەتتى.

قازاقپارات بۇل تۋرالى «گولوس امەريكي» جاڭالىقتار قىزمەتىنە سىلتەمە جاساپ حابارلايدى.

شاراعا قاتىسۋشىلار الدىندا ءسوز سويلەگەن ا ق ش- تىڭ 46-پرەزيدەنتى بۇگىنگى كۇن - دەموكراتيا جەڭىسكە جەتكەن كۇن بولعانىن اتاپ ءوتتى.

«بۇل - ۇلى مەملەكەت جانە ءبىز - جاقسى ادامدارمىز»، - دەدى بايدەن.

ونىڭ ايتۋىنشا، ەلدە كوپتەگەن دۇنيەنى قايتا جوندەپ، جاڭادان قۇرۋ قاجەت.

«ءبىز ۇلكەن ىستەردى جۇزەگە اسىرۋعا قاۋقارلىمىز»، - دەدى ول. «تاريح، سەنىم جانە اقىل- پاراسات - بىزگە بىرلىككە باستار جولدى كورسەتەدى»، - دەپ قوستى پرەزيدەنت.

د. بايدەن امەريكا قوعامىنداعى كەلىسپەۋشىلىكتەر جىككە بولىنۋگە الىپ كەلمەۋى تيىستىگىن ەسكە سالدى. ول بارشا امەريكالىقتىڭ پرەزيدەنتى بولاتىنىن باسا ايتتى.

«ءبىز ازاماتتىق ەمەس بۇل سوعىستى توقتاتۋىمىز كەرەك... اتقارىلۋى ءتيىس ىستەردى جۇزەگە اسىرۋ كەزىندە ءبىز ءبىر-بىرىمىزگە قاجەت بولامىز»، - دەدى ا ق ش باسشىسى. ەلدىڭ 46-پرەزيدەنتى شەشىمىن تابۋى ءتيىس تۇيىتكىلدەردىڭ اراسىندا ارتىپ كەلە جاتقان تەڭسىزدىك پەن جۇيەلى ناسىلشىلدىك بارىن اتاپ ءوتتى.

يناۋگۋراتسيا اياقتالعان سوڭ دجو بايدەن مەن ۆيتسە-پرەزيدەنت كامالا حارريس ارلينگتون ۇلتتىق زيراتىنداعى بەلگىسىز سولدات بەيىتىنە گۇل شوقتارىن قويۋ راسىمىنە قاتىستى. ءمالىم ەتىلگەندەي، ودان كەيىن اق ش- تىڭ جاڭادان سايلانعان پرەزيدەنتى ءبىرقاتار قۇجاتقا قول قويدى. ولاردىڭ اراسىندا ۇلىقتاۋ كۇنىنە وراي پروكلاماتسيا، كابينەت قۇرامىنداعى لاۋازىمدارعا نوميناتسيالار جانە جانە وزگە دە قىزمەتتەرگە نوميناتسيالار بار.

بۇعان دەيىن ب. بايدەننىڭ كومانداسى ونىڭ العاشقى تاپسىرمالارىنىڭ قاتارىندا دۇنيەجۇزىلىك دەنساۋلىق ساقتاۋ ۇيىمىمەن ىقپالداستىقتى قايتا جانداندىرۋ، كليمات جونىندەگى پاريج كەلىسىمىنە قايتا قوسىلۋ، بىرنەشە مۇسىلمان ەلدەرىنەن ا ق ش- قا كەلۋگە تىيىم سالۋ تۋرالى د. ترامپتىڭ تاپسىرماسىنىڭ كۇشىن جويۋ، ا ق ش- تا ناسىلدىك تەڭ قۇقىقتى قامتاماسىز ەتۋ بويىنشا ءۇل ۇكىمەتىنىڭ كۇش-جىگەرىن بەلسەندىرۋ، بالا كەزىندە امەريكاعا زاڭسىز كەلگەن ازاماتتاردىڭ قۇقىعىن قورعاۋدى كۇشەيتۋ جارلىقتارى بولاتىنىن اتاپ وتكەن ەدى.

سونىمەن قاتار، د. بايدەن ەل حالقىن ازاماتتىق پاتريوتتىققا شاقىرىپ، كوروناۆيرۋس پاندەمياسى كەزىندە ماسكا تاعۋعا ۇندەۋ جولدايتىنى ايتىلعان. بۇعان دەيىن حابارلاعانىمىزداي، سارسەنبى كۇنى دجو بايدەن ا ق ش پرەزيدەنتى لاۋازىمىنا رەسمي كىرىستى. ال كامالا حارريس ۆيتسە-پرەزيدەنت بولدى.

ەسكە سالايىق، 2020-جىلدىڭ 6- قاڭتارى كۇنى ا ق ش كونگرەسى سايلاۋشىلاردىڭ داۋىسىن ەسەپتەپ، 2020-جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى.

الايدا، بۇعان دەيىنگى پرەزيدەنت دونالد ترامپتىڭ جاقتاستارى جاپپاي نارازىلىق اكسياسىن باستاپ، ولاردىڭ ءبىر توبى كونگرەسس عيماراتىنا باسىپ كىردى. سالدارىنان 4 ادام قازا بولدى. وسىدان كەيىن ا ق ش كونگرەسىنىڭ وكىلدەر پالاتاسىنا دونالد ترامپتىڭ يمپيچمەنتى تۋرالى رەسمي رەزوليۋتسيا ەنگىزىلدى. ول بۇلىككە ازعىردى دەپ ايىپتالۋدا.

سەناتتا بۇل ماسەلە قاشان قارالاتىنى ءالى جاريالانعان جوق. ترامپ كىنالى دەپ تانىلعان جاعدايدا، وعان مەملەكەتتىك لاۋازىمدارعا قايتا تاعايىندالۋعا تىيىم سالىنۋى مۇمكىن. 2021-جىلدىڭ 7- قاڭتارى كۇنى دجو بايدەن ا ق ش پرەزيدەنتى رەتىندە رەسمي تانىلدى.