الماتى وبلىسىندا شەكتەۋ شارالارى كۇشەيتىلەدى، تالدىقورعان - قىزىل ايماقتا

كوروناۆيرۋستىق ينفەكسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا «قىزىل» جانە «سارى» ايماقتارداعى شەكتەۋ شارالارىن كۇشەيتۋ تۋرالى شەشىم قابىلدادى. بۇل تۋرالى الماتى وبلىسى اكىمىنىڭ باسپا ءسوز قىزمەتى مالىمدەدى.

اقپاراتقا سايكەس 2021 -جىلعى 12 -قاڭتارداعى جاعداي بويىنشا وبلىستا ك ۆ ي-دىڭ 7730 جاعدايى تىركەلگەن. وبلىستا سىرقاتتانۋشىلىقتىڭ ءوسۋى 2020 -جىلدىڭ قازان ايىنان باستالدى، ينفەكسيانىڭ تىركەلۋى 3 ايدا 7,5 ەسەگە ارتتى: قىركۇيەك - 74 جاعداي، قازان - 184 جاعداي، قاراشا - 591 جاعداي؛ جەلتوقسان - 1386 جاعداي. قاڭتار ايىنىڭ 11 كۇنىندە كوروناۆيرۋستىق ينفەكسيانىڭ 597 جاعدايى تىركەلدى.

بۇگىندە وبلىس اۋرۋحانالاردا 434 ادام ەمدەلۋدە، ونىڭ 29 ى اۋىر حالدە، 357 ادام امبۋلاتوريالىق ەمدەلۋدە. كوروناۆيرۋستىق ينفەكسيانىڭ جۇقتىرۋ قاۋپى قوعامدىق ورىنداردا (ساۋدا جانە قوعامدىق تاماقتاندىرۋ وبەكتىلەرى، بازارلار) جوعارىلاپ وتىر، بۇل جەرلەردە ناۋقاستاردىڭ %40 جانە وتباسىندا %25 جۇقتىرعان.

«بۇل مەرەكە كۇندەرى قالا مەن وعان جاقىن اۋدانداردىڭ تۇرعىندارى سانيتارلىق دارىگەردىڭ تالاپتارىن ساقتاماي، شەكتەۋ شارالارىن بۇزعانىن كورسەتەدى. ماسەلەن، جاڭا جىلدىق دەمالىس كۇندەرىنەن كەيىن تالدىقورعان قالاسىنداعى كوروناۆيرۋستىق ينفەكتسيا بويىنشا ەپيدەميولوگيالىق جاعداي قاۋىپتى بولىپ وتىر، باعالاۋ ماتريتساسىنا سايكەس قالا «قىزىل ايماقتا»، ال كوكسۋ، ەسكەلدى جانە پانفيلوۆ اۋداندارى «سارى ايماقتا» قالىپ وتىر. بيىلعى جىلدىڭ قاڭتار ايىنىڭ 11-كۇنى ىشىندە تالدىقورعان قالاسىندا 135 ادام، كوكسۋ اۋدانىندا 62 ادام، ەسكەلدى اۋدانىندا 41 ادام ينفەكسيا جۇقتىرعان. وسىعان سايكەس ەپيدەميولوگيالىق جاعدايدى باقىلاۋدى كۇشەيتۋ ماقساتىندا تالدىقورعان قالاسىندا، كوكسۋ، ەسكەلدى اۋداندارىندا 13- قاڭتاردان باستاپ دەمالىس كۇندەرىنە (لوكداۋن) قوسىمشا شەكتەۋلەر ەنگىزىلەتىن بولادى»، - دەلىنگەن اتالعان ۆەدومستۆونىڭ باسپا ءسوز قىزمەتى تاراتقان حابارلامادا.

مەيرامحانالار مەن ءدامحانالار (الىپ كەتۋ جانە جەتكىزۋ - شەكتەۋسىز)، ويىن- ساۋىق ورتالىقتارى، ساۋدا ۇيلەرى (ازىق- تۇلىك بازارلارىن، ءدارىحانالاردى، سۇلۋلىق سالوندارىن، حيميالىق تازارتۋ ورىندارىن قوسپاعاندا)، جابىق بازارلاردىڭ (ازىق- تۇلىك جانە ازىق- تۇلىك ەمەس)، ساۋنالار مەن سپا سالونداردىڭ، سپورتتىق- ساۋىقتىرۋ ورتالىقتارى، مۇز ايدىندارىنىڭ جانە ت. ب. جۇمىسى توقتاتىلادى.

ەپيدەميولوگيالىق جاعدايعا بايلانىستى وسى جىلدىڭ 21 - قاڭتارىنا دەيىن اتالعان ايماقتاردىڭ مەكتەپتەرىندە ونلاين وقىتۋ مەرزىمى ۇزارتىلدى.

اۆتور: سامال قابىشەۆا