وسكەمەندىك پوليتسەيلەر سۋدا اعىپ بارا جاتقان جىگىتتى قۇتقاردى

قاڭتاردىڭ 11 ىندە تۇنگى ساعات 23.40-تا «102» ارناسىنا ەر ادامنىڭ پونتون كوپىرىنەن سەكىرمەكشى بولىپ تۇرعاندىعى تۋرالى حابار تۇسكەن. 2 مينۋتتىڭ ىشىندە وقيعا ورنىنا پوليتسيا لەيتەنانتى مەيىرحان راقىشەۆ پەن پوليتسيا كىشى لەيتەنانتى باۋىرجان ريزابەكوۆ جەتتى. ولار كوپىردىڭ قورشاۋىنان ءبىر قولىمەن ۇستاپ، وزەنگە سەكىرگەلى تۇرعان ەر ادامدى كورگەن. «ءتارتىپ ساقشىلارى ونى ۇستاپ قالۋعا تىرىسقانىمەن جىگىت كوپىردەن وزەنگە قۇلايدى. پوليتسەيلەر سۋدىڭ اعىنى جىگىتتى تومەن قاراي الىپ كەتكەندىكتەن جاعالاۋ بويىمەن جۇگىرگەن. شامامەن 900 مەتر جۇگىرگەن سوڭ «كومەكتەسىڭدەر، مەن توڭدىم» دەگەن جىگىتتىڭ داۋىسىن ەستىپ، ويلانباستان سۋعا ءتۇسىپ، قۇتقارۋ ارقانىنا بايلانعان شەڭبەردى لاقتىرادى. ءسويتىپ شەڭبەردى ۇستاپ ۇلگەرگەن ەر ادامدى سۋدان جاعالاۋعا شىعارىپ، بىردەن جەدەل جاردەم شاقىرتقان»، - دەپ حابارلادى قالالىق پوليتسيا باسقارماسىنىڭ باسپا ءسوز قىزمەتى.

انىقتالعانداي، 26 جاستاعى تۇرعىن ماس كۇيدە بولعان. ول ءوز ارەكەتىنىڭ سەبەبىن تۇسىندىرە المادى.

اۆتور: تالعاتجان مۇحامەتبەك ۇلى