د د س ۇ وكىلدەرى قىتايعا بارىپ، كوروناۆيرۋستىڭ شىعۋ سەبەبىن زەرتتەيدى
نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق ساراپشىلار توبى قىتايعا 14-قاڭتاردا بارادى. بۇل تۋرالى وسى ەلدىڭ سىرتقى ىستەر مينيسترلىگى مالىمدەدى.
دەلەگاتسيا «كوۆيد-19» - دىڭ شىعۋ سەبەبىن انىقتاۋ ءۇشىن زەرتتەۋ جۇرگىزبەك. نەگىزى 10 ادامنان تۇراتىن توپ قاڭتار ايىنىڭ باسىندا بارۋ كەرەك ەدى، ءبىراق جۇمىستى باستاۋعا ءتۇرلى كەدەرگىلەر بولدى. ساراپشىلار 2 اپتالىق كارانتينگە وقشاۋلانادى. سوندىقتان ءارى قاراي ۋحان قالاسىنا قاشان باراتىنى ازىرگە بەلگىسىز بولىپ تۇر.
ماريون كۋپمانس، ددسۇ ساراپشىلار توبىنىڭ وكىلى: - ىندەتتىڭ قالاي باستالعانىن مۇقيات زەرتتەپ، ءمان- جايدى تولىق انىقتاۋعا بارىمىزدى سالامىز. ۆيرۋستىڭ شىعۋىنا ناقتى نە سەبەپ بولدى؟ ارينە ونىڭ قالاي شىققانىنا قاتىستى بىرنەشە نۇسقا بار. جارقاناتتاردان پايدا بولۋى مۇمكىن. ءبىراق بولاشاقتا وسى ۆيرۋسقا توتەپ بەرۋ ءۇشىن ونىڭ قالاي پايدا بولعانىن ءبىلىپ الۋىمىز قاجەت.
24.kz
