سايلاۋدان كەيىن الدىمىزدا اۋقىمدى جۇمىستار تۇر - ەلباسى

تۇڭعىش پرەزيدەنت بۇكىلحالىقتىق سايلاۋ وتكىزىلىپ، تۇتاس حالىق بولىپ ەلدىڭ بولاشاعىنا داۋىس بەرگەنىن اتاپ ءوتتى.

«بۇل الداعى بەسجىلدىق باعدارلامامىزدى بەكىتكەن ۇلكەن سايلاۋ بولدى. بۇل سايلاۋدا Nur Otan پارتياسى تاعى دا ۇلكەن جەڭىسكە جەتىپ، حالىقتىڭ سەنىمىنە بولەندى. سوندىقتان الدىمىزدا اۋقىمدى جۇمىستار تۇر. بۇگىن كونستيتۋتسيامىز بويىنشا قازاقستان حالقى اسسامبلەياسىنان سايلاناتىن 9 كانديداتقا داۋىس بەردىك. اسسامبلەيامىز 25 جىلدان بەرى ەلىمىزدەگى ەتنوستار مەن دىندەردى ءبىر- بىرىنە جاقىنداستىراتىن، توزىمدىلىكتى تاربيەلەيتىن، بىرلىكتى ناسيحاتتايتىن، ەلىمىزدى العا جەتەلەيتىن بىرەگەي ورگان بولىپ كەلە جاتىر»، - دەدى ەلباسى.

وسى ورايدا ن. نازاربايەۆ باسقا ەلدەر قازاقستان تاجىريبەسىن ۇيرەنىپ جاتقانىن اتاپ ءوتتى. سوندىقتان اسسامبلەيادان سايلانعان دەپۋتاتتار ەلدىڭ بىرلىگىن ساقتاپ، قازاق حالقىنىڭ توڭىرەگىندە بارلىق ادامداردى بىرىكتىرۋگە ءوز ۇلەستەرىن قوسادى.

بۇدان بۇرىن حابارلانعانداي، قازاقستان حالقى اسسامبلەياسىنىڭ ءتوراعاسى، ەلباسى نۇرسۇلتان نازاربايەۆ ق ح ا كەڭەسى ۇسىنعان پارلامەنت ءماجىلىسى دەپۋتاتتىعىنا كانديداتتارعا داۋىس بەردى.

اۆتور: رۋسلان عابباسوۆ