سايلاۋ: الماتىدا ەپيدەميولوگيالىق قاۋىپسىزدىكتى قامتاماسىز ەتۋ ءۇشىن قانداي شارالار قابىلداندى

كوروناۆيرۋس پاندەمياسىنا بايلانىستى، سونداي-اق الماتىنىڭ «سارى ايماقتا» تۇرعانىن ەسكەرە وتىرىپ، مەگاپوليستە قالا تۇرعىندارى مەن قوناقتارىنىڭ دەنساۋلىعىن قامتاماسىز ەتۋ، سونداي-اق ىندەت جۇقتىرۋدىڭ الدىن الۋ ءۇشىن بارلىق شارالار قابىلداندى، دەپ حابارلايدى قازاقپارات ءتىلشىسى.

بارلىق ۋچاسكەدە سايلاۋدا داۋىس بەرۋدى ۇيىمداستىرۋ جانە وتكىزۋ كەزىندە COVID-19 كوروناۆيرۋستىق ينفەكسياسىنىڭ تارالۋىنىڭ الدىن الۋ الگوريتمى پىسىقتالدى. سايلاۋ ۋچاسكەلەرى بويىنشا نەگىزگى سانيتارلىق- ەپيدەميولوگيالىق تالاپتار:

- الەۋمەتتىك قاشىقتىقتى ساقتاۋ ءۇشىن داۋىس بەرۋ بولمەسى جەتكىلىكتى مولشەردە كەڭ بولۋى ءتيىس؛

- عيماراتقا كىرە بەرىستە جانە سايلاۋ ۋچاسكەسىنىڭ ءۇي- جايىندا ك ۆ ي- دىڭ الدىن الۋ بويىنشا اقپارات ورنالاستىرىلادى؛

- سايلاۋ ۋچاسكەسىنىڭ اۋماعىندا جانە داۋىس بەرۋگە ارنالعان ءۇي- جايدا سايلاۋشىلار لەگىنىڭ باعىتىن كورسەتەتىن بەلگىلەر ورنالاستىرۋ، 1,5-2 مەتر قاشىقتىقتى بەلگىلەۋ؛

- داۋىس بەرۋگە ارنالعان ءۇي-جايدا قولدى دەزينفەكسيالاۋعا ارنالعان انتيسەپتيكالىق قۇرالى بار سانيتايزەرلەردى ورناتۋ؛

- قاجەتتىلىگىنە قاراي داۋىس بەرۋگە ارنالعان كابينالارعا سانيتارلىق وڭدەۋ جۇرگىزۋ؛

- دەزينفەكسيالاۋ قۇرالدارىن پايدالانا وتىرىپ، عيماراتقا ۇنەمى ىلعالدى تازالىق جۇرگىزۋ. بۇل رەتتە ەسىك تۇتقالارىن، تايانىشتاردى، داۋىس بەرۋگە ارنالعان كابينالاردى، ۇستەلدەر مەن ورىندىقتاردىڭ جاناسۋ بەتتەرىن، كەڭسە تەحنيكاسىن، داۋىس بەرۋگە ارنالعان ستاتسيونارلىق جانە تاسىمالداناتىن جاشىكتەردى دەزينفەكسيالاۋعا ەرەكشە نازار اۋدارۋ قاجەت؛

- داۋىس بەرۋگە ارنالعان عيماراتتىڭ كىرەبەرىسىندە جانە ودان شىعاتىن جەردە پايدالانىلعان جەكە قورعانىش قۇرالدارىن جيناۋ جانە ولاردى ودان ءارى كادەگە جاراتۋ ءۇشىن كونتەينەرلەر ورناتۋ. ەپيدەميولوگتاردىڭ ايتۋىنشا، داۋىس بەرۋ الدىندا جانە كۇنى بويى بولمەنى جەلدەتىلەدى. ءوز كەزەگىندە، ق ر باس مەملەكەتتىك سانيتار دارىگەرىنىڭ №69-قاۋلىسىنا سايكەس، جاسىرىن داۋىس بەرۋ ءۇشىن الدىڭعى پەردەسى جوق كابينالاردى پايدالانۋ قاراستىرىلعان.

بۇل تالاپ سايلاۋ وتكىزۋ جونىندەگى زاڭناماعا قايشى كەلمەيدى جانە 2020 -جىلدىڭ تامىزىندا ق ر پارلامەنتى سەناتىنىڭ دەپۋتاتتارىن سايلاۋ كەزىندە دە قولدانىلدى.

بۇل شارا اۋانىڭ تابيعي اينالىمىنا ىقپال ەتەدى جانە ينفەكسيانىڭ تارالۋىن بولدىرماۋ ءۇشىن قوسىمشا جەلدەتۋدى قامتاماسىز ەتەدى.

«سايلاۋ پروتسەسىنە قاتىسۋشىلاردىڭ دەنساۋلىعى مەن ءومىرىنىڭ قاۋىپسىزدىگىن قامتاماسىز ەتۋ ماڭىزدى اسپەكتىلەردىڭ ءبىرى بولىپ تابىلادى. الماتى قالاسىنىڭ تۇرعىندارى مەن قوناقتارىن شەكتەۋ شارالارىنا تۇسىنىستىكپەن قاراۋعا جانە وزدەرى مەن جاقىندارى ءۇشىن سانيتارلىق نورمالاردى ساقتاۋعا شاقىرامىز. سونداي - اق، ساياسي پارتيالاردىڭ وكىلدەرىنە بارلىق تالاپتاردى قاتاڭ جانە بۇلجىتپاي ورىنداۋعا جانە ولاردىڭ ساقتالۋىنا جاۋاپتى تۇلعالاردى تاعايىنداۋعا شاقىرامىز»، - دەيدى الماتى قالاسى سانيتارلىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا.

اۋماقتىق سايلاۋ كوميسسياسىنىڭ اقپاراتىنا سايكەس، سايلاۋ كوميسسيالارىنىڭ بارلىق مۇشەلەرى داۋىس بەرۋگە ارنالعان عيماراتتان تىس جەردە ازاماتتاردىڭ داۋىس بەرۋىن ۇيىمداستىرۋعا ارنالعان بەتپەردەلەرمەن، قورعانىش ەكراندارىمەن، قولعاپتارمەن، سانيتايزەرلەرمەن، قورعانىش حالاتتارىمەن قامتاماسىز ەتىلگەن.

كوروناۆيرۋس ينفەكسيانىڭ تارالۋىنا جول بەرمەۋ ماقساتىندا سايلاۋ كوميسسيالارىنىڭ بارلىق مۇشەلەرى، سەنىم بىلدىرىلگەن ادامدار، بايقاۋشىلار پ ت ر ادىسىمەن COVID-19-عا زەرتحانالىق تەكسەرۋدەن وتەدى. ءاربىر زەرتحانا ينتەگراتسيا ارقىلى اقپاراتتىق جۇيەگە تەستىلەۋدەن وتكەن بارلىق ادامدار ءۇشىن مارتەبە بەرەتىندىگىن اتاپ وتكەن ءجون، ەگەر تەست وڭ ناتيجە كورسەتسە، ول جەكە دەرەكتەر بازاسىندا تىركەلەدى. كورسەتىلگەن جۇيەدە ج س ن بويىنشا تەكسەرۋگە الماتى قالاسىنىڭ مەملەكەتتىك سانيتارلىق ەپيدەميولوگيالىق باقىلاۋ ورگانى قول جەتكىزە الادى، ولار پ ت ر- تەستىلەردىڭ ۇسىنىلعان ناتيجەلەرىنىڭ دۇرىستىعىن تەكسەرە الادى.