پوليتسەيدى بالاعاتتاعان اقتوبە تۇرعىنى كوشەنى قاردان تازارتىپ ءجۇر

استانا اۋداندىق پروباتسيا قىزمەتىنىڭ حابارلاۋىنشا، ول ءتۇس مەزگىلىندە ىشىمدىك ءىشىپ، ماس كۇيىندە جۇبايىن ۇرىپ-سوققان. اقتوبەلىك ايەل بۇل تۋرالى تۋعان-تۋىستارىنا ايتىپ، كومەك سۇرادى. جاناشىر تۋىستارى پوليتسياعا حابار بەردى.

«شاقىرتۋ بويىنشا مەكەنجايعا بارعان ۋچاسكەلىك پوليتسيا ينسپەكتورلارى الدىمەن ونىڭ جۇبايىمەن سويلەستى. كەيىن كۇيەۋىنىڭ ماس ەكەنىن دالەلدەۋ ءۇشىن ساراپتامادان ءوتۋىن سۇرادى. سول كەزدە پروباتسيالىق باقىلاۋداعى اقتوبەلىك ۋچاسكەلىك پوليتسيا ينسپەكتورلارىن بالاعاتتاپ، قولىنا تۇسكەن تەمىرمەن ۇرا باستاعان. سوت وتىرىسىندا اقتوبە قالاسىنىڭ تۇرعىنى ە. ءوز كىناسىن تولىق مويىنداپ، ق ر ق ك-نىڭ 378-بابىنىڭ 1- بولىگى، 380-بابىنىڭ 1-بولىگىمەن 300 ساعاتقا قوعامدىق جۇمىسقا تارتىلدى. قازىرگى كەزدە ول كۇن سايىن 8 ساعات بويى كوشەنى قاردان تازارتادى»، - دەدى استانا اۋداندىق پروباتسيا قىزمەتى.

ونىڭ جۇمىس اۋماعىن اقتوبە قالالىق اكىمدىگى بەلگىلەيدى.

«اقتوبە قالاسىنىڭ استانا اۋداندىق پروباتسيا قىزمەتىندە قازىرگى تاڭدا 21 سوتتالعان ازامات زاڭ بۇزعانى ءۇشىن قوعامدىق جۇمىسقا تارتىلعان. بۇلار استانا اۋدانى اكىمدىگى بەلگىلەپ بەرگەن قوعامدىق ورىنداردا كوشەنى قاردان، سونداي-اق قوعامدىق ورىنداردى تازالاۋ سەكىلدى جۇمىستاردى ورىنداۋدا»، - دەيدى اقتوبە قالاسىنىڭ استانا اۋداندىق پروباتسيا قىزمەتىنىڭ اعا ينسپەكتورى جۇماگۇل ەشنيازوۆا.

اۆتور: التىناي ساعىندىقوۆا