ۆاشينگتوندا ترامپ جاقتاستارىنىڭ نارازىلىق اكسياسىنان كەيىن كومەندانتتىق ساعات ەنگىزىلدى
ۆاشينگتون. قازاقپارات – ا ق ش استاناسىندا جاپپاي تارتىپسىزدىككە بايلانىستى كومەندانتتىق ساعات ەنگىزىلدى، دەپ حابارلايدى قازاقپارات BBC اگەنتتىگىنە سىلتەمە جاساپ.
سارسەنبى كۇنى ا ق ش كونگرەسى سايلاۋشىلاردىڭ داۋسىن ەسەپتەپ، 2020 -جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. وزدەرىڭىزگە بەلگىلى، بۇل سايلاۋدا دەموكراتتار پارتياسىنىڭ وكىلى دجو بايدەن جەڭىسكە جەتكەن ەدى. ۆاشينگتوندا بۇعان دەيىنگى پرەزيدەنت دونالد ترامپ جاقتاستارىنىڭ جاپپاي نارازىلىق اكسياسىنان كەيىن وعان قاتىسۋشىلاردىڭ ءبىر توبى كونگرەسس عيماراتىنا باسىپ كىردى. جالپى، دونالد ترامپ وسىنىڭ الدىندا ۆاشينگتوننىڭ ورتاسىندا مىڭداعان ادام جينالعان ميتينگتە ءسوز سويلەپ، ءوزىنىڭ جەڭىلگەنىن مويىندامايتىنىن ايتقان. ءسويتىپ وزىنە سەنەتىن قاۋىمدى كاپيتوليي عيماراتىنا بارىپ، نارازىلىق بىلدىرۋگە شاقىردى.
ءتۇن جارىمىنا قاراي ا ق ش كونگرەسى مەن سەناتىن كۇزەتەتىن پوليتسيا ترامپتىڭ جاقتاستارىن كاپيتوليي اۋماعىنان تىقسىرىپ شىعاردى. قاۋىپسىزدىكتىڭ جاڭا پەريمەترى ۇكىمەت مەكەمەلەرىنەن 100-150 مەتر قاشىقتىقتا دەپ بەلگىلەنگەن. پوليتسيا دەمونسترانتتاردى ءالى دە قۋىپ جاتىر. سەنات عيماراتىن ا ق ش ۇلتتىق ۇلانىنىڭ جاساعى دا كۇزەتىپ تۇر. سوعان قاراماستان پوليتسيا نارازىلىق بىلدىرۋشىلەردى ۇستاپ، قاماعان جوق. ولار تەك ترامپ جاقتاستارىنىڭ بۇل جەردەن كەتۋگە ۇگىتتەپ، كوندىرىپ جاتىر. بيلىك كومەندانتتىق ساعات ەنگىزدى. نارازىلىق اكسياسىنان كەيىن ا ق ش كونگرەسى داۋىس سەرتيفيكاتتاۋدى جالعاستىرۋعا دايىن ەكەنىن مالىمدەدى.
