ەلوردا جاستارىنا ارنالعان جاڭا تۇرعىن ءۇي باعدارلاماسى قاشان ىسكە قوسىلاتىنى ايتىلدى

بۇل سۇراققا «وتباسى بانكى» باسقارما ءتوراعاسى ءلاززات يبراگيموۆا Facebook-دە وتكەن تىكەلەي ەفير بارىسىندا جاۋاپ بەردى، دەپ حابارلايدى قازاقپارات.

«ءبىز قازىرگى تاڭدا اكىمدىكپەن بىرگە بۇل باعدارلامانىڭ تالاپتارىن تالقىلاپ جاتىرمىز. ول - «ەلوردا جاستارى» باعدارلاماسى دەپ اتالادى. الدىن الا كەلىسىمدەر بار. اتالمىش باعدارلاما ەڭ الدىمەن جاس وتباسىلاردى قولداۋعا باعىتتالعان. ول جەردە دە ليميت بەكىتىلەدى. 5 پايىزدىق ستاۆكا بولسا، باستاپقى جارنا كولەمى شامامەن 10 پايىزعا تەڭ بولۋى كەرەك. ەڭ ءبىرىنشى كەزەكتە ول باعدارلاماعا استانادا ەڭبەك ەتەتىن، الايدا كەزەككە تۇرا الماي جۇرگەن جاستاردى قوسقىمىز كەلەدى. قازىرگى تاڭدا باعدارلامانى ىسكە قوسۋدىڭ فينالدىق ساتىسىندا تۇرمىز. ەلوردا اكىمى التاي سەيدىر ۇلىنىڭ (كولگىنوۆ - اۆت. ) ءوزى دە قولداۋ بىلدىرۋدە. مەنىڭ ويىمشا، الداعى ءبىر جارىم ايدىڭ ىشىندە ءبىز ەلوردا جاستارىنا ارنالعان جاعىمدى جاڭالىقتى جاريالايمىز»،- دەدى ءلاززات يبراگيموۆا.