اۋا رايىنىڭ قولايسىزدىعى الەمدى ابىگەرگە سالدى

مىڭداعان ادام باسپاناسىز قالىپ، جان ساۋعالاپ كەتتى. ءبىر ەلدە توپەلەپ قار جاۋسا، ەندى بىرىندە الاپات ءورت دەس بەرمەي تۇر.

***

بوليۆيا سۋ تاسقىنىنان زارداپ شەكتى. ايماقتا كوپتەگەن عيماراتتى سۋ باسقان. ادام شىعىنى دا بار. وسى ۋاقىتقا دەيىن 4 كىسى كوز جۇمعان. وپات بولعانداردىڭ سانى ءالى دە ءوسۋى مۇمكىن. قازىر ايماقتا قۇتقارۋ وپەراتسياسى ءجۇرىپ جاتىر.

***

ال اۆستراليانىڭ پەرت قالاسىندا قازىر الاپات ءورت. وتتىڭ ورشىگەنى سونشا، ونى ءسوندىرۋ قيىنعا سوعىپ تۇر. ماماندار قانشا ارپالىسقانىمەن، قىزىل جالىن بوي بەرمەي بارادى. جەلدىڭ ەكپىنى، وتتى ودان سايىن ءورشىتتى. ءىستىڭ وسىلاي ناسىرعا شابۋىنا بايلانىستى جەرگىلىكتى تۇرعىندار جاپپاي قاۋىپسىز جەرگە كوشىرىلگەن.

رەيچەل حاينس- ۆەسسون، جەرگىلىكتى تۇرعىن:

- قازىر جولدار جابىق. ۇيىمىزگە قاشان ورالاتىنىمىزدى بىلمەيمىز. باسپانامىز جارامدى ما جوق پا، ول دا بەلگىسىز.

***

ءۇندى جەرىندە دە تابيعات توسىن مىنەز تانىتتى. ەلدىڭ سولتۇستىگىندەگى سريناگار قالاسىندا قار قالىڭ جاۋىپ، جۇرتتى ابىگەرگە ءتۇسىردى. جولدار جابىلعان. ۇيلەر جارىقسىز. ال ەل استاناسى نيۋ- دەليدى قويۋ تۇمان باسىپ تۇر.

دجايانت حالدەر، تۋريست:

- تۇماننان تۇك تە كورىنبەيدى. قالادا ءجۇرىپ- تۇرۋدىڭ ءوزى قيىندادى.

***

يتاليالىقتار قار قۇرساۋىندا قالدى. اق ۇلپا سولتۇستىك وڭىردەگى ۇيلەردى باسىپ، جولداردى جاۋىپ تاستاعان. ويتكەنى قاردىڭ قالىڭدىعى كەي جەرلەردە 2 مەتردەن اسادى. قازىر ايماقتا ءورت سوندىرۋشىلەر مەن قۇتقارۋشىلار جۇمىس ىستەپ جاتىر. دەي تۇرعانمەن، سينوپتيكتەردىڭ بولجامى كوڭىل كونشىتپەيدى. ولاردىڭ ايتۋىنشا، الداعى دەمالىس كۇندەرى دە تۇرعىندار اق تۇتەكتەن كوز اشپايدى.