مۇرات باقتيار ۇلى: تاۋەلسىزدىكتىڭ التىن ارقاۋى - ۇلتتىق مۇددە
«بيىل تاۋەلسىزدىگىمىزگە 30 جىل تولاتىندىعىن جانە تاريحتىڭ وسى ءبىر اسا قىسقا مەرزىمىندە قانداي تاريحي جەتىستىكتەر مەن تابىستارعا قول جەتكىزگەندىگىمىز جايلى قازاقستان رەسپۋبليكاسىنىڭ پرەزيدەنتى قاسىم- جومارت كەمەل ۇلى توقايەۆ بيىلعى جىلدىڭ 5- قاڭتارى كۇنگى «ەگەمەن قازاقستان» گازەتىندە تولىق اشىپ كورسەتەدى. پرەزيدەنتىمىز ايتىپ وتىرعانىنداي، راسىندا دا، ءبىز ءۇشىن تاۋەلسىزدىك بارىنەن دە قىمبات ەكەندىگىن ءاربىر قازاقستاندىق جەتە سەزىنە بىلۋگە ءتيىستى. تاۋەلسىزدىك جىلدارى قول جەتكىزگەن تابىستى دا ەشكىم جوققا شىعارا المايدى. ءبىز ەندىگى ارادا تاۋەلسىز قازاقستاننىڭ وتىز جىلدا قول جەتكىزگەن تابىستارىن باياندى ەتە وتىرىپ، ەل ەگەمەندىگىن ودان ءارى نىعايتۋعا مىندەتتىمىز. قازىر الەم بويىنشا پاندەميا ىندەتىنىڭ تارالۋىنا بايلانىستى الەۋمەتتىك جانە ەكونوميكالىق سالادا كۇردەلى جاعداي قالىپتاسىپ وتىرعانى بەلگىلى. ىندەتتىڭ زارداپتارى ءبىزدىڭ ەلىمىزدى دە اينالىپ وتپەگەندىگى انىق»، - دەدى سەناتور.
سونىمەن قاتار م. باقتيار ۇلى قازاقستاندى ءبىرتۇتاس مەمەلەكەت رەتىندە الەم مويىندانىن ەسكە سالدى.
«پرەزيدەنتىمىزدىڭ ماقالاسىندا قاسيەتتى قازاق جەرى ەڭ باستى بايلىعىمىز دەپ اتاپ كورسەتىلگەن. ەندىگى ارادا جەرىمىزدىڭ تۇتاستىعىنا كۇمان كەلتىرۋدىڭ قاجەتى جوق جانە بۇل ورايدا سىرتقى ارانداتۋشىلاردىڭ ارەكەتتەرىنە ەرمەي، ەجەلگى كورشىلەرىمىزبەن ىنتىماعىمىزدى، بىرلىگىمىزدى جوعالتپاۋ قاجەتتىگى ايتىلادى. قازاقستان ءبىرتۇتاس مەمەلكەت ەكەندىگىن الەم مويىنداعالى قاشان! مەملەكەت باسشىسى ءوزىنىڭ وسى ماقالاسىندا ۇلتتىق مۇددەنىڭ تاۋەلسىزدىكتىڭ التىن ارقاۋى ەكەندىگىنە باسا نازار اۋدارىپ وتىر. بۇل ورايدا، مەملەكەتتىك ءتىلدىڭ ەلىمىزدىڭ باستى نىشاندارىنىڭ ءبىرى ەكەندىگى رەتىندە قاراستىرىلۋى ابدەن ورىندى بولعان. سوندىقتان دا، قازاقستاننىڭ مەملەكەتتىك ءتىلى - قازاق ءتىلى ەكەندىگىنە باسا نازار اۋدارىلىپ، بۇل ءتىلدى بۇكىل حالقىمىزدى بىرىكتىرۋشى كۇشكە اينالدىرۋ قاجەتتىگى وتە جاقسى ايتىلىپتى. ماسەلە - ەندى وزىمىزدە! ءار قازاق بالاسى ەڭ اۋەلى ءوزىنىڭ انا تىلىنە ءوزى قامقور بولۋعا ءتيىستى. ءوسىپ كەلە جاتقان ۇرپاعىمىزدى ءوز تىلىندە تاربيەلەۋ ءار اتا- انانىڭ ۇلت الدىنداعى پارىزى بولسا كەرەك»، - دەدى دەپۋتات.
«سونىمەن بىرگە، پرەزيدەنت قازاقستاننىڭ ءاربىر ازاماتىنىڭ مەملەكەتتىك ءتىلدى ءبىلۋى پارىز، مىندەت ەكەندىگىن اتاپ كورسەتىپ، قازاق ءتىلىن مەڭگەرە الماي جۇرگەندەرگە ۇندەۋ تاستايدى. «ەشتەن كەش جاقسى» دەگەن حالىق دانالىعى العا تارتىلىپ، مەملەكەتتىك ءتىلدى ۇيرەنۋگە ەڭ باستىسى ىنتا كەرەكتىگى ايتىلادى. قازاق حالقى قاي زاماندا بولماسىن وزگە ۇلىستارمەن تاتۋ بىرلىكتە ءومىر سۇرە بىلگەن. ەشكىمدى جاتسىنعان جوق. بۇل - تاريحي اقيقات. مەملەكەت باسشىسى وسى جايلى ايتا وتىرىپ، ەلدەگى تۇراقتىلىق پەن بەرەكە، بىرلىك ءۇشىن ءبارىمىزدىڭ جاۋاپتى ەكەندىگىمىزدى دۇرىس ايتقان. ءبىز قاشان بولسىن حالقىمىزدى بىرىكتىرەتىن ورتاق قۇندىلىقتاردى دارىپتەپ، سونى وي ساناعا بەرىك ورنىقتىرۋ جونىندە ايتىلعان ويدى قوستار ەدىم. تاۋەلسىزدىگىمىزدىڭ التىن ارقاۋى جانە باستى قۇندىلىعى ۇلتتىق مۇددە ەكەندىگىنە مەملەكەت باسشىسى ءوز ماقالاسىندا كەڭىنەن توقتالادى. بىزگە ۇلتتىق مۇددە قىمبات بولسا، تاۋەلسىزدىك تە قىمبات! حالقىمىزدىڭ بار جاقسى قاسيەتتەرى، ۇلتتىق مۇددەسى تەك قانا تاۋەلسىز ەلدىڭ جاعدايىندا عانا دامىپ، ءورىسىن كەڭەيتە تۇسەتىندىگىن ۇمىتپايىق. سوندىقتان دا، تاۋەلسىزدىگىمىزدى باياندى ەتە بىلەيىك!»، - دەدى مۇرات باقتيار ۇلى.
اۆتور: رۋسلان عابباسوۆ
