پرەزيدەنت: قازاقتىڭ جەرى ەشبىر شەتەلدىكتىڭ مەنشىگىنە بەرىلمەيدى، ەشقاشان ساتىلمايدى
پرەزيدەنت قاسىم-جومارت توقايەۆ وسىنى ءار ازاماتىمىز ساناسىنا بەرىك ءسىڭىرۋى قاجەتتىگىن ءمالىم ەتتى، دەپ حابارلايدى قازاقپارات ءتىلشىسى.
«جەرگە بايلانىستى ءبارىمىز ايقىن بىلەتىن جانە بۇلجىمايتىن اقيقات - قازاقتىڭ جەرى ەشبىر شەتەلدىكتىڭ مەنشىگىنە بەرىلمەيدى، ەشقاشان ساتىلمايدى. وسىنى ءار ازاماتىمىز ساناسىنا بەرىك ءسىڭىرۋى قاجەت. كەلەسى جىلى جەر كودەكسىنىڭ جەكەلەگەن نورمالارىنا قاتىستى ەنگىزىلگەن ءموراتورييدىڭ مەرزىمى اياقتالادى. اۋىل شارۋاشىلىعى ماقساتىنداعى جەرلەردى اينالىمعا ەنگىزىپ، حالىقتىڭ يگىلىگىنە جاراتۋ - وتە ماڭىزدى ماسەلە. سوندىقتان، بيىل جەر ماسەلەسى جونىندەگى كوميسسيانى قۇرىپ، سونىڭ اياسىندا ءبىر بايلامعا كەلگەن ءجون»، - دەپ جازدى پرەزيدەنت «تاۋەلسىزدىك بارىنەن قىمبات» اتتى ماقالاسىندا.
مەملەكەت باسشىسى قازاق ءۇشىن توقىمداي جەردىڭ ءوزى قىمبات، ءبىر ۋىس توپىراقتىڭ ءوزى التىن ەكەنىن ايتىپ ءوتتى. ء«بىراق ءبىز سونى باعالاي بىلەمىز بە؟! جەر قادىرىن ءبىلۋ جالاڭ ۇرانمەن ولشەنبەيدى. وكىنىشكە قاراي، اسقار تاۋلارىمىز بەن ايدىن كولدەرىمىزدى، ۇلان- عايىر دالامىزدى لاستاپ جاتقان دا ءوز ازاماتتارىمىز. كوكجايلاۋعا وت جاعىپ، قوقىس شاشىپ كەتكەن دە، كوبەيتۇزدىڭ باتپاعىن شەلەكتەپ تاسىپ، كولدىڭ ورتاسىندا كولىكپەن ويقاستاعان دا سولار.
ءبىر تۇتام ءمۇيىزى ءۇشىن كوزىن مولدىرەتىپ كيىكتەردى قىرعان دا وزگەلەر ەمەس. قاسيەتتى جەرىمىزدىڭ كيەسىنەن قورىقپاي، جات جۇرتتىڭ دا قولى بارماس ارەكەتتەردى جاساپ وتىرىپ، قالايشا وسى مەكەننىڭ يەسىمىز دەپ كەۋدە سوعا الامىز؟ بۇل - اششى دا بولسا، شىندىق. ءبىز جەرىمىزدىڭ شىن جاناشىر يەسى ەكەنىمىزدى ناقتى ىسپەن كورسەتۋگە ءتيىسپىز. ول كوشەگە قوقىس تاستاماۋ، كورىنگەن جەرگە وت جاقپاۋ سياقتى قاراپايىم نارسەلەردەن باستاپ، جالپىحالىقتىق سيپاتتاعى اۋقىمدى ەكولوگيالىق شارالار ارقىلى كورىنىس تابۋى قاجەت»، - دەدى ول.
