پرەزيدەنت: بيلىكتەگى ازاماتتار ەڭ الدىمەن ۇلتتىق مۇددەگە بەرىك بولۋعا ءتيىس
«جاھاندانۋ زامانىندا ايداي الەم الاقانداعىداي بولىپ قالدى. تالاپتى ۇل-قىزدارىمىزدىڭ جەر جۇزىندەگى كەز-كەلگەن ەلگە بارىپ، ءبىلىم الۋى قالىپتى ۇردىسكە اينالدى. سوندا قالىپ، قىزمەت ىستەپ جۇرگەندەر دە از ەمەس. وسى ورايدا، ەل ىشىندە جاستار شەتەلگە كەتىپ جاتىر دەگەن الاڭداۋشىلىق بار. مەن جاستارىمىز ءبىلىمىن جەتىلدىرىپ، ءبارىبىر ەلگە ورالادى نەمەسە شەتەلدە ءجۇرىپ- اق قازاقستاننىڭ مۇددەسىن قورعايدى دەپ سەنەمىن»، - دەدى مەملەكەت باسشىسى ماقالاسىندا.
پرەزيدەنت حالقىمىزدا «اتىڭ باردا جەر تانى، جەلىپ ءجۇرىپ» دەگەن ءسوز بارىن، كەزىندە ەلباسى بوزبالا شاعىندا ۋكرايناعا اتتانىپ، ەڭبەك، ءبىلىم جانە اكىمشىلىك داعدىلارىنا يە بولعانىن، ءوزى دە ءبىلىم قۋىپ ماسكەۋگە ساپار شەگىپ، وزگە مەملەكەتتەردە جۇمىس ىستەگەنىن ەسىنە الادى.
«ءبىزدىڭ تالاي زامانداستارىمىز بۇگىنگى جاستار سياقتى الىس شەتەلدەرگە بارا الماسا دا، كەڭەس وداعىنىڭ ءتۇرلى قالالارىندا ءبىلىم الدى. ءبىراق، باسىم كوپشىلىگى تامىرىنان اجىراپ، ول جاقتا ءبىرجولا قالىپ قويعان جوق. ەلگە كەلىپ، ەڭبەك ەتتى. سوندىقتان جىراقتا جۇرگەن جاستارىمىزدان ايىرىلىپ قالامىز دەپ ۋايىمداۋدىڭ ءجونى جوق. ءبىزدىڭ مىندەتىمىز - ولاردىڭ بويىنا مەملەكەتشىلدىك رۋحىن ءسىڭىرىپ، قاي جەردە جۇرسە دە تۋعان ەلدىڭ يگىلىگىنە قىزمەت ەتۋگە جۇمىلدىرۋ. مىسالى، الەمنىڭ ەڭ دامىعان ەلدەرىندە ءوز كاسىپتەرىن باستاعان جانە الپاۋىت كومپانيالاردا جۇمىس ىستەپ جۇرگەن ازاماتتارىمىزدىڭ وسىنداعى زامانداستارىمەن بايلانىسىن نىعايتىپ، تالىمگەرلىك ەتۋىنە جاعداي جاساۋىمىز كەرەك»، - دەيدى قاسىم-جومارت توقايەۆ.
پرەزيدەنت سونىمەن قاتار دارىندى جاستاردىڭ ءبارى شەتەلدە جۇرمەگەنىن ايتىپ ءوتتى. ەل ىشىندە دە بىلىكتى ءارى ءبىلىمدى ورەندەر جەتىپ ارتىلادى.
«ءبىز ولاردى باسشىلاردىڭ جاڭا بۋىنىن دايىنداۋعا بارىنشا تارتىپ جاتىرمىز. مەنىڭ باستاماممەن قۇرىلعان پرەزيدەنتتىك كادر رەزەرۆى - وسىنىڭ ايقىن دالەلى. جوبانىڭ كەلەسى كەزەڭىندە قوعام مۇددەسىنە ادال كوشباسشىلاردى ىرىكتەۋگە ەرەكشە نازار اۋدارامىز. بيلىك ورگاندارىنداعى ازاماتتار، ەڭ الدىمەن، ۇلتتىق مۇددەگە بەرىك بولۋعا ءتيىس. ءبىز نە ىستەسەك تە، ءبارىن كەلەر ۇرپاق ءۇشىن جاسايمىز. مەملەكەتتىك ساياساتتىڭ بولاشاق الدىنداعى جاۋاپكەرشىلىگىن تەرەڭ سەزىنەمىز. بۇل ۇستانىمنان ەشقاشان اينىمايمىز. ەڭ عاجايىپ ەرلىكتەر وتانعا شەكسىز سۇيىسپەنشىلىكتەن تۋىندايتىنى ءسوزسىز. شىن وتانسۇيگىشتىك دەگەنىمىز - جالاڭ ۇران تاستاۋ ەمەس، ەلىڭە، حالقىڭا قىزمەت ەتۋ»، - دەدى ول.
