بريتاندىق كوروناۆيرۋس شتامىنىڭ قازاقستاندا تارالۋ قاۋپى بار ما
نۇر- سۇلتان. قازاقپارات - بۇگىنگى تاڭدا ۇلىبريتانيادا انىقتالعان كوروناۆيرۋستىڭ جاڭا ءتۇرى الەمنىڭ بىرنەشە ەلدەرىندە - قىتايدا، ا ق ش- تا جانە ەۋروپا ايماقتارىندا تارالۋدا.
ونىڭ قازاقستاندا تارالۋ قاۋپى قانشالىقتى جوعارى؟ بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە ايتىلدى، دەپ حابارلايدى قازاقپارات ءتىلشىسى.
«مامىر ايى مەن قىركۇيەك ايى ارالىعىندا تابىلعان 130 سىناماعا گەنەتيكالىق زەرتتەۋ جۇرگىزدىك. ۆيرۋستار اراسىنان بريتاندىق مۋتاتسيا تابىلعان جوق. بۇل ۆيرۋستار گەرمانيا، يسپانيا، ۋكراينا، رەسەي، ا ق ش جانە قىتايدا تابىلعان ۆيرۋستارعا ۇقساس. بۇگىنگى كۇنى ءبىز كەلەسى گەنەتيكالىق تەستىلەۋ جۇرگىزۋ ءۇشىن قازان مەن جەلتوقسان ارالىعىندا ايماقتاردان تابىلعان سىنامالاردى جيناپ جاتىرمىز»، - دەيدى ق ر د س م سانيتارلىق- ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا.
سونداي- اق، ول بريتانيا مەن قازاقستان اراسىندا تىكەلەي بايلانىس جوق ەكەنىن جەتكىزدى.
«ەستەرىڭىزدە بولسا، 6-قازاننان باستاپ شەتەلدەن كەلەتىندەرگە پ ت ر تەستتەن ءوتۋ تۋرالى تالاپ قويىلعان. پ ت ر تەستتەن وتپەگەندەر مىندەتتى تۇردە كارانتيندىك ستاتسيونارعا ورنالاسىپ، پ ت ر تەست تاپسىرىپ، ناتيجەسىن سول جەردە كۇتەدى. نەگىزى ۆيرۋستاردىڭ مۋتاتسيالانۋى - قالىپتى جاعداي. كوروناۆيرۋس گەنەتيكالىق تۇرعىدان ادامعا قاتىسى جوق، جارقاناتتارعا قاتىسى بار ۆيرۋس. ول ءبىر جىل بويى وزگەرىسكە ۇشىراپ، بەيىمدەلىپ كەلەدى. ول مۋتاتسيالانعان ۆيرۋس جانە مۋتاتسيالانا بەرەدى»، - دەيدى ايجان ەسماعامبەتوۆا.
