قازاقستانداعى قالالاردىڭ ورتالىعىندا قانداي شىرشا تۇر
ودان كەيىن بۇل ءۇردىس وزگە وڭىرلەردە دە جالعاسىن تاپتى. كەي وڭىردە سالتاناتتى شارا ونلاين رەجيمدە وتسە، كەي وڭىردە شىرشا ماڭىندا ساناۋلى اتا-انا مەن بالا عانا بولدى، دەپ حابارلايدى قازاقپارات ءتىلشىسى.
22-جەلتوقسان كۇنى كەشكى ساعات 20:00-دە استاناداعى بارلىق شىرشانىڭ شامى جاندى. قالا تۇرعىندارى مەن قوناقتارى EXPO كەشەنى ماڭىنا جينالدى. ەلىمىزدىڭ باس شىرشاسى وسى جەرگە ورناتىلعان. جالپى، نۇر-سۇلتاننىڭ تۇكپىر- تۇكپىرىنە ۇزىن- ىرعاسى 30 جاڭاجىلدىق شىرشا قويىلعان. سونداي-اق، نۇر-سۇلتان قالاسىنداعى بايتەرەك مونۋمەنتى جانىنا قۇراق كورپەدەن جاسالعان شىرشا قويىلدى. ەرەكشە شىرشانىڭ بيىكتىگى - 6 مەتر، قۇراقتىڭ ۇزىندىعى - 70 مىڭ مەتر، ونى جاساۋعا 200-دەن استام ادام اتسالىسقان. الماتى اكىمدىگىنىڭ وكىلدەرى جاڭاجىلدىق شىرشا مەن قالانى بەزەندىرۋگە اقشا بولىنبەگەنىن ءمالىم ەتتى.
مەرەكەگە وراي مادەنيەت باسقارماسىنىڭ ۆەدومستۆوعا قاراستى مەكەمەلەرى 25 ءىس-شارا ۇيىمداستىردى. ونىڭ كوپشىلىگى ونلاين فورماتتا وتەدى.
پاۆلوداردا باس شىرشا شامىن 24-جەلتوقسان كۇنى تىكەلەي ەفيردە جاقتى. كارانتينگە بايلانىستى سالتاناتتى شارا العاش رەت Ertis تەلەارناسىنىڭ ەفيرىندە ءوتتى.
كەنشىلەر قالاسى - قاراعاندىدا جاڭا جىلدىق باس شىرشانىڭ شامدارىن جاعۋ سالتاناتى 25 جەلتوقسان كۇنى ونلاين فورماتتا ءوتتى.
ءدال وسى كۇنى كوكشەتاۋداعى ابىلاي حان الاڭىندا جاڭا جىلدىق باس شىرشانىڭ شامدارى جاعىلدى. باس شىرشانىڭ بيىكتىگى - 22 مەتر، «دوستار» مادەنيەت ءۇيى الاڭىنداعى شىرشانىڭ بيىكتىگى 18 مەتردەن كەم ەمەس.
26-جەلتوقساندا تۇركىستاندا اكىمشىلىك- ىسكەرلىك ورتالىقتاعى شىرشانىڭ شامىن قالا اكىمىنىڭ ورىنباسارى مەرلان كەرىمجانوۆ جاقتى. وبلىس ورتالىعىندا ەرتەرەكتە قالا تۇرعىندارى اراسىندا جۇرگىزىلگەن ساۋالناما قورىتىندىسىنا سايكەس، وتكەن جىلعى شىرشالار ورناتىلىپ، بەزەندىرۋ جۇمىسى جۇرگىزىلگەن بولاتىن.
26-قاڭتاردا شىمكەنتتە جاڭاجىلدىق شىرشا شامى جاعىلدى. بيىل پاندەمياعا بايلانىستى مەرەكەلىك شاراعا ساناۋلى بالا اتا- اناسىمەن قاتىستى. اكىمشىلىك- ىسكەرلىك الاڭىنداعى جاساندى شىرشانىڭ بيىكتىگى 25 مەتر. ونى بەزەندىرۋگە جالپى ۇزىندىعى 1200 مەتر قىلقان جاپىراق، 110 جارىق شامى مەن 760 التىن شار، 800 مەتر جىلتىراق جۇمسالعان.
29-جەلتوقسان كۇنى ساعات 18:00-دە وسكەمەندەگى رەسپۋبليكا الاڭىندا باس شىرشانىڭ شامى جارقىرادى. قالا باسشىسى جاقسىلىق وماردىڭ ايتۋىنشا، بۇگىندە قازاقستان كوشەسى، جەڭىس داڭعىلى، كومەندانتكا وزەنى، ۋشانوۆ الاڭى، مەتاللۋرگتەر مادەنيەت سارايىنىڭ الدىنداعى سكۆەر، اربات پەن رەسپۋبليكا الاڭى مەرەكەگە وراي بەزەندىرىلدى.
اۆتور: زارينا قاھارمان
