سولتۇستىك قازاقستاندا زاڭسىز ەلىك اتقان براكونەر سوتتالدى

س ق و سوتى باسپا ءسوز قىزمەتىنىڭ مالىمەتىنشە، 29-قاراشا كۇنى تيميريازيەۆ اۋىلىنىڭ تۇرعىنى اڭ اۋلاۋعا شىققان. ونىڭ ءسىبىر ەلىگىن اتۋعا رۇقسات بەرەتىن جولداماسى بولماعان. ال وزىمەن بىرگە الىپ شىققان قوساۋىز مىلتىعىن زاڭدى تۇردە تىركەمەگەن. راسسۆەت ەلدىمەكەنىنە قاراي باعىت العان ول القاپتا جايىلىپ جۇرگەن ءتورت ءسىبىر ەلىگىن كورەدى. كوپ ويلانباستان مىلتىعىن الىپ، جابايى اڭنىڭ بىرەۋىن اتىپ الادى. وسىلايشا سوتتالۋشى مەملەكەتكە 1041750 تەڭگە شىعىن اكەلگەن. تيميريازيەۆ اۋداندىق سوتى قىلمىستىق ءىستى قارادى. سوت بارىسىندا سوتتالۋشى ءوز كىناسىن تولىق مويىندادى. سوت زاڭسىز ەلىك اتقان اۋىل تۇرعىنىنىڭ 1,5 جىلعا باس بوستاندىعىن شەكتەدى. سونداي- اق ول 3 جىلعا اڭ اۋلاۋ قۇقىعىنان ايىرىلدى. ۇكىم ازىرگە زاڭدى كۇشىنە ەنگەن جوق.