كوروناۆيرۋس شاشتىڭ تۇسۋىنە الىپ كەلە مە - دارىگەر پىكىرى

وسى ورايدا اتالعان تاقىرىپ توڭىرەگىندەگى ساۋالدارعا باس تەرىسى اۋرۋلارىن ەمدەۋمەن اينالىساتىن تريحولوگ دارىگەر دەلنۇر قامباروۆا جاۋاپ بەردى، دەپ حابارلايدى قازاقپارات ءتىلشىسى.

«سوڭعى ۋاقىتتا ءبىزدىڭ ورتالىققا شاش ءتۇسۋى ماسەلەسىمەن ەمدەلۋگە كەلەتىندەر كوبەيدى. بۇل كەزدەيسوق جاعداي ەمەس. سەبەبى كوروناۆيرۋسپەن اۋىرعان ناۋقاستاردا شاشتىڭ ءتۇسۋى ءجيى كەزدەسەدى. ىندەت ورگانيزمدەگى ءتۇرلى ۆيرۋستارعا قارسى تۇراتىن يممۋندىق جۇيەنى جويىپ جىبەرەدى. سونداي- اق، اعزاداعى ۇساق تامىرلاردى زاقىمدايدى. ياعني، كاپيلليار تامىرلاردا ترومبوز (قان اينالىمىنىڭ باياۋلاۋى) پايدا بولادى. ال شاش نەگىزگى قورەگىن وسى ۇساق تامىرلار ارقىلى الادى. ءبىزدىڭ كۇنەدەلىكتى ىشەتىن تاعامداردىڭ قۇنارى قان قۇرامىنا ءتۇسىپ، ءبىرىنشى رەتتە جۇرەك، بۇيرەك جانە وكپەگە باعىتتالادى. ال ودان قالعان قان قۇرامىنداعى ءنارلى زاتتار ۇساق تامىرلار ارقىلى باس تەرىسىنە بارادى. ال كوروناۆيرۋسقا شالدىققانداردىڭ قانى ۇيىپ، سالدارىنان كاپيلليار تامىرلار بىتەلەدى. وسى كەزەڭدە شاش قاجەتتى قورەگىن الا المايدى. بۇل شاشتىڭ ەرتە تۇسۋىنە الىپ كەلەدى»، - دەيدى دەلنۇر ابدۋكاحار قىزى.

تريحولوگ ماماننىڭ ايتۋىنشا، كوروناۆيرۋستان ەمدەلىپ شىققان ناۋقاستا شاشتىڭ ءتۇسۋى 3-5 ايدان سوڭ باستالادى.

«ەلىمىزدە كوروناۆيرۋس ينفەكتسياسى ماۋسىم- شىلدە ايلارىندا ءورشىدى. وسى ارالىقتا ىندەتكە شالدىققان ادامدار شاش ءتۇسۋىنىڭ جيىلەگەنىن تەك ەندى بايقاپ جاتىر. بۇل دەرت جاس ەرەكشەلىگىنە قاراماستان كوبىندە كەزدەسەدى. دەگەنمەن، قوبالجۋدىڭ قاجەتى جوق. سەبەبى كوروناۆيرۋس سالدارىنان پايدا بولعان شاش ءتۇسۋ اۋرۋى ەمدەلەدى. تەك دەر كەزىندە دارىگەر كومەگىنە جۇگىنسەڭىز بولعانى. ماماندار كەشەندى ەم ارقىلى قان اينالىمىن رەتتەپ، دۇرىس تاماقتانۋ جولدارىن ۇسىنادى. قازىر بويىندا قورەكتىك زاتتارى مول تاعامداردى تۇتىنعان ءجون. قۇرامىندا قانتى بار گازدالعان سۋسىنداردان باس تارتۋ كەرەك. ويتكەنى مۇنداي سۋسىنداردىڭ قۇرامىنداعى زياندى زاتتار تامىردى بىتەپ، قان اينالىمى جۇيەسىن بۇزادى. سونىمەن قاتار، فاستفۋد جانە جارتىلاي دايىن ونىمدەردەن دە باس تارتقان ابزال. كەرىسىنشە قوي ەتىن جانە ءسۇت ونىمدەرىن ءجيى تۇتىنعانىمىز دۇرىس. ىندەتتەن قورقىپ، كۇيزەلىسكە ءتۇسۋدىڭ قاجەتى جوق. سەبەبى سترەسسكە بوي الدىرعان ادامنىڭ باس تەرىسىندەگى ۇساق تامىرلارى قالىپتى جۇمىس ىستەۋىن توقتاتادى»، - دەپ اتاپ ءوتتى دەلنۇر قامباروۆا.

دارىگەر پىكىرىنشە، تازا اۋادا سەرۋەندەپ، دەنە شىنىقتىرۋ جاتتىعۋلارىن جاساۋ قان اينالىمىن رەتتەۋگە كومەكتەسەدى. سونداي- اق د دارۋمەنىن قولدانۋ يممۋندىق جۇيەنى قالىپقا كەلتىرۋگە ىقپال ەتەدى. دەگەنمەن ماماندار ۇيدە ءوز بەتىنشە ەم الماي، ءبىرىنشى كەزەكتە دارىگەر كومەگىنە جۇگىنۋگە كەڭەس بەرەدى.