الماتىدا باسىنا مۇز ءتۇسىپ مەرت بولعان ايەلدىڭ ءولىمى: پ ي ك ءتوراعاسى ايىپتاۋمەن كەلىسپەدى

ول ايىپتاۋمەن كەلىسپەدى. تىڭدالىم بوستاندىق اۋدانىنىڭ №2-اۋداندىق سوتىندا ءوتىپ جاتىر.

پروتسەسس ونلاين ءوتىپ جاتىر. الماتىلىقتىڭ ولىمىنە قاتىستى ءىستى سۋديا اراي نۇعمانوۆا قاراپ جاتىر.

ايىپتالۋشى – پ ي ك باسشىسى. بۇگىنگى وتىرىستا ايىپتالۋشى ءسوز سويلەدى.

«مەن ايىپتاۋمەن كەلىسپەيمىن. مەن ءوز مىندەتىمدى دۇرىس ورىندادىم دەپ ويلايمىن. ءبىر ايتارىم، مەن شارۋامەن اينالىساتىن كىسى بولمادىم، بۇل جاعدايدا ءبىر جەردەن ءمۇلت كەتكەن شىعارمىن. ەگەر بىلسەم، شەشىم قابىلدار ەدىم...»، - دەدى ايىپتالۋشى.

سونىمەن قاتار، پ ي ك ءتوراعاسى 2018 -جىلدىڭ 1-اقپانىنان باستاپ جۇمىسقا كىرىسكەنىن ايتادى. ايىپتالۋشى تەرگەۋ كەزىندە ءۇيدىڭ «شالا بىتكەنىن» ايتقان.

«بۇل ءۇيدىڭ شاتىرىنىڭ فورماسى ءبىزدىڭ شارتقا ساي كەلمەدى. ياعني مەنىڭشە، تۇرىك قۇرىلىسشىلارى ونى تۇركياداعى جاعدايعا ساي سالعان. الماتىداعى كەز كەلگەن كوپقاباتتى تۇرعىن ۇيگە قاراساڭىز ءبىر دە ءبىر سالۋشى ولاي سالمايدى.

ەگەر مۇزدى كورسەم مىندەتتى تۇردە الىپ تاستار ەدىم. شاتىر بارلىق پانورامانى كورۋگە مۇمكىندىك بەرمەيدى. بۇل شاتىر تەك الپينيست كوتەرىلە الاتىن كۇمبەز جۇيەسى بويىنشا سالىنعان»، - دەدى ايىپتالۋشى.

بۇعان قاتىستى پروكۋرور: «نەلىكتەن پ ي ك ءتوراعاسى سول پروبلەمالاردى بىلە تۇرا الپينيستەردى جالداماعانىن» سۇرادى.

ەسكە سالايىق، 2018 -جىلدىڭ قاراشاسىندا الماتىلىق ايەلدىڭ باسىنا مۇز ءتۇسىپ مەرت بولعانى حابارلانعان ەدى. وقيعا 20-قاراشادا ساعات 12.52-دە بولعان. ماركوۆ كوشەسى، №75 -مەكەنجايىنداعى 9 قاباتتى («AdalResidence») تۇرعىن ءۇيدىڭ توبەسىنەن مۇز تۇسكەن بولاتىن.