ءبىرجان نۇرىمبەتوۆ ەڭبەكاقى بويىنشا ەڭ كوپ بەرەشەگى بار ءۇش ءوڭىردى اتادى

«بۇگىنگى تاڭدا رەسمي ستاتيستيكا بويىنشا ەلىمىزدەگى جۇمىس ىستەپ تۇرعان 324 مىڭ كاسىپورىندا 6 ميلليون 650 مىڭنان استام جۇمىسكەر ەڭبەك ەتۋدە. ولاردىڭ جالاقىسى بىلتىرعى جىلمەن سالىستىرعاندا ورتا ەسەپپەن 6,9 پايىزعا ءوسىپ وتىر. دۇنيەجۇزىلىك ەكونوميكالىق فورۋمنىڭ جاھاندىق باسەكەگە قابىلەتتىلىك يندەكسىنىڭ 2019-جىلىنىڭ قورىتىندىسى بويىنشا ەڭبەك نارىعى تيىمدىلىگى رەيتينگىسىندە قازاقستان 30-ورىننان 25-ورىنعا كوتەرىلدى»، - دەدى ءبىرجان نۇرىمبەتوۆ ۇكىمەت وتىرىسىندا.

ءمينيستردىڭ ايتۋىنشا، ەڭبەك قاتىناستارىنا قاتىستى ماسەلەلەر كەزەڭ-كەزەڭىمەن وڭ شەشىمىن تابۋدا.

«ءبىرىنشىسى - ەڭبەكاقىنىڭ ۋاقىتىندا تولەنۋ ماسەلەسى. بۇگىنگى كۇنى ەڭبەكاقى بويىنشا جالپى بەرەشەگى 724 ميلليون تەڭگەنى قۇراپ وتىر. ول جىل باسىنان بەرى 49 پايىزعا نەمەسە 696 ميلليون تەڭگەگە ازايدى. دەگەنمەن ونىڭ ىشىندە وڭىرلەر بولىنىسىندە ەڭ ۇلكەن بەرەشەك ماڭعىستاۋ، ش ق و جانە الماتى وبلىستارىنا تيەسىلى»، - دەدى ول.