تولەم كارتاسى قانداي جاعدايلاردا بۇعاتتالادى

«جاقىندا مەنىڭ بانك كارتامدى ءبىرجاقتى تارتىپپەن بۇعاتتاپ تاستادى. تيىسىنشە، مەن قاراجات الا المادىم. كەيىن بۇعاتتان شىعاردى، ءبىراق مەنىڭ سۇراعىم بار. جالپى كارتانى كىم بۇعاتتاي الادى، ەگەر بانك قاتەلەسكەن بولسا، بانكتى قالاي جاۋاپكەرشىلىككە تارتۋعا بولادى؟»، - دەلىنگەن قويىلعان ساۋالدا.

وسى سۇراققا جاۋاپ بەرگەن ماماندار ەميتەنت بانك قاي جاعدايلاردا تولەم كارتوچكاسىن بۇعاتتاي الاتىنىن ءتۇسىندىردى. بۇل تۇرعىدا بۇعاتتاۋ جايلارى: تولەم كارتوچكاسىنىڭ يەسى بانك مەنەدجەرىنە ونىڭ جوعالعاندىعى، ۇرلانعاندىعى نەمەسە رۇقساتسىز پايدالانعاندىعى تۋرالى حابارلاسا، «پلاستيك» ۇستاۋشى تولەم كارتوچكاسىن بەرۋ تۋرالى شارتتى ورىندامايتىن بولسا، سونداي- اق تاراپتار اراسىنداعى شارتتا كوزدەلگەن، ياعني تولەم كارتوچكاسىن پايدالانۋدىڭ ىشكى قۇجاتى ساقتالماسا.

«سونىمەن قاتار، ۋاكىلەتتى مەملەكەتتىك ورگانداردىڭ نەمەسە لاۋازىمدى تۇلعالاردىڭ وكىمدەرى نەگىزىندە شىعىس وپەراتسيالارىن جۇرگىزۋگە شەكتەۋ سالىنۋى مۇمكىن. مىسالى، سالىق تولەمەۋ، تەرگەۋ جۇمىستارىن جۇرگىزۋ كەزىندە، الاياقتىق وپەراتسيالارعا جانە باسقالارىنا كۇماندى بولعان كەزدە. اتاپ ايتقاندا، تولەم كارتوچكاسى بويىنشا كۇماندى، كۇدىكتى وپەراتسيالار جاسالعاندا، ولاردىڭ الدىن الۋ ءۇشىن بانكتەر ولاردىڭ جەكە تۇرلەرىنە جۇيەلىك شەكتەۋلەر قويۋى مۇمكىن. ولاردى بەلگىلەۋ شارتتارى، سونداي- اق ولاردى الۋ ءتارتىبى تولەم كارتوچكاسىن شىعارۋ تۋرالى شارتتا كورسەتىلگەن»، - دەلىنگەن حابارلامادا.

مۇنىمەن قوسا، ق ر قارجى مينيسترلىگى قارجى مونيتورينگى كوميتەتىنىڭ تەرروريزم مەن ەكسترەميزمدى قارجىلاندىرۋمەن بايلانىستى ۇيىمدار مەن تۇلعالار تىزبەسىنە ەنگىزىلگەن ۇيىمدار مەن جەكە تۇلعالار تۋرالى اقپاراتى دا شەكتەۋلەرگە نەگىز بولا الادى.

«قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس- قيمىل تۋرالى» ق ر زاڭىنىڭ نورمالارىندا بانكتەر مۇنداي فاكتىلەردىڭ الدىن الۋ جانە جولىن كەسۋ ءۇشىن وپەراتسيا كۇدىكتى دەپ تانىلعان كەزدە ونى ورىنداۋ الدىندا ق ر ق م ق م ك- كە دەرەۋ حابارلاۋعا مىندەتتى ەكەندىگى ايقىندالعان. بۇل رەتتە، ەگەر بانكتىڭ كليەنتتەرى - ۇيىم نەمەسە جەكە تۇلعا تەرروريزم مەن ەكسترەميزمدى قارجىلاندىرۋمەن بايلانىستى ۇيىمدار مەن تۇلعالار تىزبەسىنە ەنگىزىلسە، بانكتەر وزدەرىنىڭ بانكتىك شوتتارىنداعى شىعىس وپەراتسيالاردى دەرەۋ توقتاتۋعا مىندەتتى. تىيىم سالۋدى سوتتار سوت اكتىلەرىنىڭ نەگىزىندە جانە سوت ورىنداۋشىلارى پروكۋرور سانكسيالاعان سوت ورىنداۋشىلارىنىڭ قاۋلىلارى نەگىزىندە ەلدىڭ قىلمىستىق- پروتسەستىك زاڭناماسىندا ءارى اتقارۋشىلىق ءىس جۇرگىزۋ تۋرالى زاڭدا كوزدەلگەن تارتىپپەن سالادى.

«ەگەر بۇعاتتاۋ نەگىزسىز بولسا، ءسىز ق ر قارجى نارىعىن رەتتەۋ جانە دامىتۋ اگەنتتىگىنە ءوز قۇقىقتارىڭىزدى قورعاۋ تۋرالى ءوتىنىش بەرۋگە قۇقىعىڭىز بار»، - دەپ اتالىپ وتكەن اگەنتتىك مالىمەتىندە.

ايتا كەتەيىك، قر قارجى نارىعىن رەتتەۋ جانە دامىتۋ اگەنتتىگى 2020 -جىلعى 25 - ماۋسىمنان باستاپ «Fingramota Online» موبيلدى قوسىمشانى ىسكە قوستى. بۇل قارجى رەتتەۋشىسىنىڭ حالىقپەن جانە بيزنەسپەن ءوزارا ءىس- ارەكەتىنىڭ ىڭعايلى قۇرالى.