مەملەكەتتىك قىزمەتشىلەرگە شەتەلدىك بانكتەن ەسەپشوت اشۋعا تىيىم سالىندى

كەڭەسشى بيىلعى 19-جەلتوقساندا مەملەكەت باسشىسى قول قويعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق پروتسەستە ازاماتتاردىڭ قۇقىقتارىن قورعاۋدى جانە سىبايلاس جەمقورلىققا قارسى ءىس- قيمىلدى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدا قامتىلعان كەيبىر نوۆەللالاردى ءتۇسىندىردى.

«شەتەلدىك بانكتەردە شوتتار اشۋعا جانە يەلەنۋگە تىيىم سالۋدان باستايىق. مۇنداي تىيىم مەملەكەتتىك قىزمەتشىلەرگە، پارلامەنت دەپۋتاتتارى مەن سۋديالارعا ەنگىزىلگەن. مۇندا مەملەكەتتىك قىزمەتتىڭ ءبىرقاتار شەكتەۋلەر قابىلدايتىن قىزمەتتىڭ ەرەكشە ءتۇرى ەكەنىن ءتۇسىنۋ قاجەت. اتالعان تۇزەتۋلەردى ازىرلەۋ كەزىندە ەل مەن حالىقتىڭ مۇددەسى ءۇشىن قىزمەت ەتۋ يدەولوگياسى ءبىرىنشى ورىنعا قويىلدى. قوعامدا اقشاسىن كوپتەگەن ازاماتتار سياقتى قازاقستاندىق بانكتەردە ەمەس، شەتەلدىك بانكتەردە ساقتايتىن شەنەۋنىكتەرگە سەنۋ قاجەت پە، بۇل شوتتار سىبايلاس جەمقورلىق سحەمالارىمەن جانە كاپيتالدى شەتەلگە شىعارۋمەن بايلانىستى ەمەس پە دەگەن سۇراقتار تۋىنداۋى مۇمكىن. سوندىقتان مەملەكەت باسشىسىنىڭ تاپسىرماسىن زاڭنامالىق ىسكە اسىرۋ ورىندى جانە دەر كەزىندە بولىپ وتىر»، - دەدى انار جاروۆا سىبايلاس جەمقورلىققا قارسى ءىس- قيمىلدى كۇشەيتۋ جونىندەگى زاڭنامالىق شارالار تۋرالى ونلاين بريفينگتە.

سپيكەردىڭ ايتۋىنشا، ەندى مەملەكەتتىك قىزمەتشىلەردى قىزمەتكە تاعايىنداۋدا ولارعا شەتەلدىك شوتتارىن جابۋ ءۇشىن 6 ايلىق مەرزىم بەرىلەتىن بولادى. جۇمىس ىستەپ جۇرگەن مەملەكەتتىك قىزمەتشىلەرگە زاڭ قولدانىسقا ەنگەن كۇننەن باستاپ، قازاقستان رەسپۋبليكاسىنان تىس ورنالاسقان شەتەلدىك بانكتەردەگى شوتتارىن جابۋعا 6 اي بەرىلەدى.

«بۇل رەتتە، زاڭدا مەملەكەتتىك قىزمەتشىلەرگە شەتەلدىك بانكتەردە شوت اشۋعا رۇقسات بەرۋ جاعدايلارى دا ايقىندالعان. ونىڭ ىشىندە - شەتەلدە جۇمىس ىستەۋ، وقۋ، تاعىلىمداما، ءىسساپار نەمەسە ەمدەلۋ نەمەسە كامەلەتكە تولماعان بالانىڭ زاڭدى وكىلى رەتىندە شەتەلدە بولۋ. بۇل جاعدايلار توقتاتىلعان سوڭ (مىسالى، شەتەلدىك ءىسساپاردان، وقۋدان جانە ت. ب. ورالعان كۇننەن باستاپ) مەملەكەتتىك قىزمەتشى 6 اي ىشىندە شەتەلدىك بانكتەگى قۇندىلىقتارى مەن قاراجاتىن ساقتاۋدى توقتاتۋعا مىندەتتى. ءدال وسى تالاپ پەن مەرزىم مۇرانى قابىلداۋ جاعدايلارىنا دا قولدانىلادى. ەگەر مەملەكەتتىك قىزمەتشى شەتەلدىك بانكتەگى شوتتى جاپقىسى كەلمەسە جانە مەملەكەتتىك قىزمەتتەن كەتۋگە نيەت بىلدىرسە، وندا ول ءوز ەركىمەن جۇمىستان بوساتۋ تۋرالى ءوتىنىش بەرۋگە قۇقىلى»، - دەيدى انار جاروۆا.

اۆتور: ايجان سەرىكجان قىزى