ەلوردادا جاڭاجىلدىق كورپوراتيۆتەردى وتكىزۋگە تىيىم سالىندى

بۇل تۋرالى ەلوردانىڭ باس سانيتارلىق دارىگەرى جاننا پىراليەۆا بريفينگتە ايتتى، دەپ حابارلايدى قازاقپارات ءتىلشىسى.

ونىڭ ايتۋىنشا، مەيرامحانالاردا، ءدامحانالاردا، بارلاردا، اسحانالاردا ۇلكەن كەزەكتەر تۋىنداۋىنا جول بەرمەۋدى ەسكەرىپ، جۇمىس جانە دەمالىس كۇندەرى قىزمەت كەستەسى ساعات 7:00-دەن ساعات 00:00-گە دەيىن بەلگىلەنىپ وتىر.

بۇل رەتتە عيمارات ىشىندە 30 ورىننان ارتىق بولماۋى، سانيتارلىق-ەپيدەميولوگيالىق، سانيتارلىق- پروفيلاكتيكالىق شارالاردىڭ ساقتالۋى، ۇستەلدەر اراسىندا كەمىندە 2 مەتر الەۋمەتتىك اراقاشىقتىق ساقتالۋى، ءار ۇستەلگە 4-6 ادامنان ارتىق وتىرعىزىلماۋى كەرەك. بۇل قاۋلى تۇرعىن ۇيلەردە ورنالاسقان نىساندارعا قاتىستى ەمەس. ولاردىڭ جۇمىس ۋاقىتى - ساعات 22:00-گە دەيىن.

«تاماقتى ۇيلەرگە جەتكىزىپ بەرۋ ءتارتىبى شاتاتتىق رەجيمدە جالعاسادى»، - دەپ ناقتىلادى جاننا پىراليەۆا.

ويىن-ساۋىق، سپورتتىق جانە باسقا دا بۇقارالىق ءىس-شارالاردى، ونىڭ ىشىندە سالتاناتتى جيىنداردى، بانكەتتەردى، ۇيلەنۋ تويلارىن، مەرەيتويلاردى وتكىزۋگە تىيىم سالىندى. كارانتين جانە شەكتەۋ شارالارى بۇزىلعان جاعدايدا نىساندار قىزمەتى توقتاتىلادى.

اۆتور: رۋسلان عابباسوۆ