ەلوردا تۇرعىنىنىڭ پاتەرىنەن بىرنەشە جۇك كولىگىمەن قوقىس شىعارىلدى

Polisia.kz پورتالىنىڭ مالىمەتىنشە، بايقوڭىر اۋداندىق پوليتسيا باسقارماسىنىڭ ۋچاسكەلىك ينپەكتورى داۋلەتبەك تاڭىربەرگەنوۆكە كوپقاباتتى ءۇي تۇرعىندارى جۇگىنىپ، پاتەرلەردىڭ بىرىنەن جاعىمسىز ءيىس شىعاتىندىعىن، تاراقان مەن تىشقان جۇرەتىندىگىن ايتىپ شاعىمدانعان. مۇنداي جايتتىڭ ورىن الۋىنا سەبەپ - كورشىلەرىنىڭ ءوزىنىڭ 3 بولمەلى پاتەرىن قوقىس الاڭىنا اينالدىرۋى. پاتەر يەسى قوقىس جاشىكتەرىنەن جۇرت تاستاعان قاجەتسىز دۇنيەلەردى ۇيىنە جيناۋعا اۋەس بولعان.

«ءمان- جايدى انىقتاۋ بارىسىندا 53 جاستاعى ازاماتتىڭ جالعىز ءوزى تۇراتىندىعى انىقتالدى. ۋچاسكەلىك ينسپەكتوردىڭ جاردەمىمەن ونىڭ پاتەرىن تازالاۋ ۇيىمداستىرىلدى. تازالاۋ جۇمىستارى ەكى كۇنگە سوزىلىپ، بىرنەشە جۇك كولىگىمەن قوقىس شىعارىلدى. ءۇي تۇرعىندارى ۋچاسكەلىك ينسپەكتورعا كومەك كورسەتكەنى ءۇشىن ريزاشىلىقتارىن ءبىلدىردى. سونىمەن قاتار ۋچاسكەلىك ينسپەكتور اتالعان ازاماتقا جەكە كۋالىگىن جانە الەۋمەتتىك تولەم الۋعا قاجەتتى قۇجاتتارىن قالپىنا كەلتىرۋگە كومەكتەستى»، - دەپ جازادى پورتال.

اۆتور: مارلان جيەمباي