تالدىقورعاندا ەگدە جاستاعى ايەلدى توناعان ۇرىنىڭ قىلمىسى كامەراعا ءتۇسىپ قالدى

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، تالدىقورعان قالاسى پب باتىس پوليتسيا ءبولىمىنىڭ كەزەكشى بولىمىنە 66 جاستاعى جەرگىلىكتى تۇرعىن تونالعانىن ايتىپ ارىزدانعان. «جاستار» شاعىن اۋدانىندا بەلگىسىز ەر ادام ايەلدەن ءاميانى، 85000 تەڭگەدەن استام اقشاسى، بانك كارتوچكاسى، جەكە كۋالىگى جانە زەينەتاقى كۋالىگى بار سومكەسىن الىپ كەتكەن. اتالعان دەرەك ق ر ق ك 191-بابىنىڭ 1-بولىگى بويىنشا سدتبت- دە تىركەلدى.

كۇدىكتى اقشانى الىپ، سومكەنى، ءامياندى جانە قۇجاتتاردى قىلمىس ورنىنا جاقىن جەرگە لاقتىرىپ جىبەرگەن. ءتارتىپ ساقشىلارى جەدەل تۇردە كۇدىكتىنىڭ تۇرعان جەرىن انىقتاپ، ونى ورتالىق ساياباق اۋماعىنان ۇستادى. ۇستالعان ازامات وبلىس ورتالىعىنىڭ ەش جەردە جۇمىس ىستەمەيتىن 19 جاستاعى تۇرعىنى بولىپ شىقتى. قاراقشىلىق دەرەگى ءتۇسىپ قالعان بەينەجازبا مەن باسقا دا دالەلدەمەلەر ۇسىنىلعاننان كەيىن، ول اقشانى ءوزىنىڭ جەكە قاجەتتىلىكتەرىنە جۇمساعانىن جەتكىزىپ، قىلمىس جاساعانىن مويىندادى.

تەرگەۋ بارىسىندا ول سومكەنى، ءامياندى جانە قۇجاتتاردى تاستاعان جەرلەردى كورسەتتى. كۇدىكتى ق ر ق ى ج ك 128-بابىنا سايكەس ۋاقىتشا ۇستاۋ وقشاۋلاعىشىنا قاماققا الىندى. وزگە اقپارات تەرگەۋ مۇددەسىنە ساي جاريا ەتىلمەيدى.

اۆتور: سامال قابىشەۆا