اقمولا وبلىسىندا بالاعا دورەكىلىك تانىتقان تاربيەشىگە قاتىستى ءىس قوزعالدى
كوكشەتاۋ. قازاقپارات - اقمولا وبلىسىنىڭ شۋچە قالاسىنداعى بالاباقشادا بالاعا دورەكىلىك تانىتقان تاربيەشىسىنىڭ ارەكەتىنە قاتىستى تەكسەرىس ءجۇرىپ جاتىر، دەپ حابارلايدى قازاقپارات ءتىلشىسى.
وقيعا شۋچە قالاسىنداعى بالاباقشالاردىڭ بىرىندە ورىن العان.
بۇل تۋرالى الەۋمەتتىك جەلىدە بەينەجازبا جاريالاندى. وندا تاربيەشىسى وتىرعان بالانىڭ استىنداعى ورىندىعىن تارتىپ الادى، كەيىن ۇيىقتاپ جاتقان توسەگىنەن تۇرعىزىپ، سۇيرەپ الىپ كەتەدى. ءارى قاراي نە بولعانى بەلگىسىز.
«وسى وقيعاعا بايلانىستى تەكسەرىس جۇرگىزىلەدى. قازىرگى كەزدە تاربيەشىسى جۇمىستان شەتتەتىلدى. تەكسەرىس قورىتىندىسى بويىنشا ءتيىستى شەشىم قابىلدانادى»، - دەدى وبلىستىق ءبىلىم باسقارماسى.
سونىمەن قاتار، پوليتسيا دەپارتامەنتى تاربيەشىگە قاتىستى ءىس قوزعالعانىن جەتكىزدى.
«كامەلەتكە تولماعانداردى قاداعالاۋدى جۇزەگە اسىرۋعا مىندەتتى تاربيە مەكەمەسى قىزمەتكەرىنىڭ ءىس- ارەكەتىن، سونداي- اق، شۋچينسك قالاسىنىڭ تۇرعىنىنان كەلىپ تۇسكەن ءوتىنىشتى نازارعا الا وتىرىپ، بۋراباي اۋدانىنىڭ پوليتسيا ءبولىمى ق ر ق ك 140-بابىنىڭ 2-بولىگى «كامەلەتكە تولماعاندى تاربيەلەۋ جونىندەگى مىندەتتەردى ورىنداماۋ» بويىنشا سوتقا دەيىنگى تەرگەۋ شارالارىن باستادى»، - دەدى ۆەدومستۆودان.
