مەسسي پەلەنىڭ رەكوردىن جاڭارتتى

نۇر-سۇلتان. قازاقپارات - يسپانيالىق «بارسەلونا» كلۋبىنىڭ شابۋىلشىسى ليونەل مەسسي ۇلى فۋتبولشى پەلەنىڭ رەكوردىن جاڭارتتى، دەپ حابارلايدى قازاقپارات.

ارگەنتينالىق ل. مەسسي بۇل ناتيجەگە يسپانيا چەمپيوناتىنىڭ 15-تۋرىندا «ۆاليادوليد» پەن «بارسەلونا» اراسىندا وتكەن ماتچتا قول جەتكىزدى. ويىننىڭ 65-مينۋتىندا 33 جاستاعى مەسسي گول سوعىپ، پەلەنىڭ ءبىر كلۋب ءۇشىن سوققان دوپ سانىنان اسىپ ءتۇستى.

وسىلايشا ل. مەسسي كاتالونيالىق «بارسەلونانىڭ» نامىسىن قورعاي ءجۇرىپ، قارسىلاستار قاقپاسىنا 644 گول ەنگىزدى. ال اتاقتى پەلە برازيليالىق «سانتوس» كلۋبىندا 1956-1974-جىلدار ارالىعىندا دوپ تەۋىپ، 643 گول سوققان بولاتىن.

سىرت الاڭدا «ۆاليادوليدتى» 3:0 ەسەبىمەن ۇتقان «بارسەلونا» 24 ۇپايمەن تۋرنير كەستەسىندە بەسىنشى ورىنعا كوتەرىلدى.