تۇركىستان وبلىسىندا تۇرمىستىق تەحنيكا شىعاراتىن ءوندىرىس ىسكە قوسىلادى

جوبا قۇنى 85 ميلليون ا ق ش دوللارىن قۇرايتىن كاسىپورىندا جىل سايىن ءبىر ميلليون تۇرمىستىق تەحنيكا شىعارىلادى، دەپ حابارلايدى قازاقپارات ءتىلشىسى.

تۇركىستان وبلىسى اكىمىنىڭ ورىنباسارى مەيىرجان مىرزاليەۆ «Artel» كومپانياسى توبىنىڭ وكىلدەرىمەن كەزدەستى. ول جاڭا سەرىكتەستەرگە ءوڭىردىڭ ينۆەستيتسيالىق احۋالى، ەكونوميكالىق مۇمكىندىكتەرى تۋرالى ايتىپ، اكىمدىك تاراپىنان جان-جاقتى قولداۋعا ۋادە بەردى.

مەيىرجان مىرزاليەۆ مۇنداي جوبالاردى ىسكە اسىرۋ ەكى ەل اراسىنداعى ىنتىماقتاستىقتى تەرەڭدەتۋ تۇرعىسىنان ماڭىزدى دەپ سانايدى.

ورتالىق ازيادا تۇرمىستىق تەحنيكا مەن ەلەكترونيكا تاۋارلارىن ءوندىرۋ سالاسىنداعى كوشباسشىلاردىڭ ءبىرى ت م د ەلدەرى مەن قازاقستان قالالارىندا اس ءۇي پليتالارىن جانە باسقا دا كوپتەگەن تەحنيكالاردى ساتۋدا.

«قازاقستان-وزبەكستان ىنتىماقتاستىعى ەكى مەملەكەتتىڭ دامۋى ءۇشىن اسا ماڭىزدى. ەلدەر اراسىنداعى تىعىز بايلانىستاردى ەكى مەملەكەت باسشىلارى باستاپ كەتتى، ەندى ءبىز ءبىرىنشى كەزەكتە دوستىق قاتىناستارعا نەگىزدەلگەن وسى ىنتىماقتاستىقتى لايىقتى جالعاستىرۋىمىز كەرەك»، - دەپ اتاپ ءوتتى مەيىرجان مىرزاليەۆ.

وبلىس اكىمىنىڭ ورىنباسارى بۇل جوبانىڭ ىسكە قوسىلۋى ەلدەگى تۇرمىستىق تەحنيكانىڭ يمپورتىن الماستىرۋعا جانە «قاراپايىم زاتتار ەكونوميكاسىن» دامىتۋعا قىزمەت ەتەتىنىن اتاپ ءوتتى.

ايتا كەتەيىك، «Artel» كومپانياسى تۇركىستان وبلىسىندا اس ءۇي پليتالارىن، ەندىرىلگەن تەحنيكانى، قالىپتاۋ بۇيىمدارىن جانە ەلەكتر سۋ جىلىتقىشتارىن شىعاراتىن زاۋىت سالادى. جوبا 2 كەزەڭدە جۇزەگە اسىرىلادى، بۇل 2 مىڭنان استام جۇمىس ورنىن اشۋعا كومەكتەسەدى.

ءبىرىنشى كەزەڭدە كەلەر جىلدىڭ سوڭىنا قاراي قولعا الىنىپ، جىل سايىنعى قۋاتى 500 مىڭ تۇرمىستىق تەحنيكا ياعني اس ءۇي پليتاسى ءوندىرىسىن ىسكە قوسۋ كوزدەلەدى.

ەكىنشى كەزەڭگە سايكەس، 2022-جىلدىڭ سوڭىنا قاراي ەلەكتر سۋ جىلىتقىشتارىن ءوندىرۋ جوسپارلانعان. جوبانى ىسكە اسىرۋدى ينۆەستيتسيالار تارتۋ جانە ەكسپورتتى دامىتۋ جونىندەگى «Turkistan Invest» وڭىرلىك اگەنتتىگى سۇيەمەلدەيدى. ول «ءبىر تەرەزە» قاعيداتى بويىنشا جۇرگىزىلمەك.